2022: na 2022, e balor tabata na 69 dòler pa akshon.

Schottegat– Ennia Caribe Holding, por a generá e dianan aki por lo ménos 240 mion dòler na benta di akshonnan Kirby Corporation, kual lo por a enserá alrededor di 115 mion dòler na ganashi. Esaki si wak e desaroyonan di e akshonnan, durante último siman riba Bolsa di Balor, Estádos Unidense.

E akshonnan di Kirby Corporation, kual tabata forma parti di e bolsa na Ennia ta oumentando di balor.  Kirby Corporation ta unu di e kompanianan ku Hushang Ansary a invertí despues di a saka i transformá su akshonnan den e konsorsio di Ennia pa kompanianan estado unidense. Ansary personalmente a kumpra akshon, pero alabes a laga Ennia Caribe Leven kumpra 2.4 mion akshon den mesun kompania. E temporada ei, e akshonnan tabata anotá na kasi 62 dòler pa kabes. Te ku siman pasá, e Bolsa di Balor na Estádos Unídos a nota un balor di 110 pa e akshonnan, lokual por a nifiká un ganashi di kasi 48 dòler pa kabes di akshon, resultando den un ganashi di 48 dòler biaha 2.4 mion akshon, pa un total di 115 mil dòler di ganashi. Un benta ku por a generá 240 mion dòler. Pero, e sifranan no ta alkansabel mas, pasobra despues di e medidanan imponé pa Banko Sentral, a laga bende tur akshon ku Ansary a laga kumpra, pa distansha e kompania mas tantu posibel for di su propietario original.

109: akshonnan di Kirby a subi i yega te na 109 dòler pa kabes.

E desaroyonan di balor riba akshonnan den Kirby tin relashon ku situashon petrolero mundialmente i entrega di e produktonan petrolero pa merkado estado unidense.  Manera publiká den Vigilante, e gigante petrolero Chevron a risibi lisensia temporal pa kuminsá eksportá produktonan petrolero for di Venezuela. Segun e agensia di notisia Reuters, e kargamentunan di krudo lo keda rafiná na kosta Sùit di Estádos Unídos. Pa Kòrsou, esaki ta un bon notisia pasobra ta amplia e posibilidatnan pa kisas almasena produkto na Bullenbaai. Pa grupo Ansary, e desaroyo nobo i posibilidat pa eksportá krudo for di Venezuela a afektá balor Kirby Corporation. Ennia lástimamente a bende nan akshonnan den Kirby i perde oportunidat mionario di rekuperashon.

Tin un desaroyo bastante interesante ku ta tumando lugá na Kòrsou ku por resultá den efektonan riba balor den akshonnan di Ansary na Estádos Unídos. Na momentu ku Chevron ehekutá nan lisensia pa eksportá krudo for di Venezuela, Estádos Unídos mester transportá e derivadonan prosesá nan na refinerianan. Esaki mester sosodé pa gran parti via di nan riwnan. Na momento e derivadonan yega na kosta di Estádos Unídos, mester di lancha pa subi e kanalnan i riwnan pa transportá. Hushang Ansary tin entre 8 pa 10% akshon den e kompania di transpòrt petrolero interno mas grandi di Estádos Unídos, Kirby Corporation.

I wowonan invershonista, mesora ta kai riba Kirby. Por ehèmpel, den apénas 3 dia ku Chevron a hasi nan anunsio, e balor di Kirby Corporation a subi ku 2.6 dòler estado unidense riba kada akshon. E subida, ta unu remarkabel si mira e reakshon dje balor riba e anunsio di Chevron. Pero e balor di Kirby, promé di e anunsio tabata luchando.  E akshonnan di Hushang Ansary den Kirby Corporation a stabilisá na 72 dòler despues di un kaida fuerte durante Covid na mart 2020. Na medio 2017, den un akuerdo di kompra i benta, Hushang Ansary a transformá su akshonnan den Stewart & Stevenson den Kirby Corporation. E transakshonnan a tuma lugá algun luna promé ku Korte a imponé un Medida di Emergensha riba kuentanan di 5 kompania na Ennia Caribe Holding.. Parman International, ku Hushang Ansary komo e akshonista prinsipal, a laga transformá un suma di 282 mion dòler fo’i grupo Ennia Caribe, den forma di invershon den Kirby Corporation, un kompania ikono den transporte industrial marítimo na Houston Texas, Estádos Unídos.  Kirby Corporation ta kapitalisá na un balor di balor di 4 bion dòler estado unidense miéntras nan preis di akshon despues di Covid na mart 2020 a bin kai bendiendo na 48 dòler miéntras na yanüari 2020 su balor tabata na 90 dòler pa akshon. Te ku ayera, e balor tabata anotá na kasi 109 dòler estado unidense.