Jan Noorduynweg – E pènel ku a hasi un investigashon pa sa den ki estado nos Universidat di Kòrsou (UoC) ta, a saka un rapòrt basta negativo tokante e universidat, pero ta hasi tambe diferente rekomendashon pa mehorá e situashon. Algu ku sigur falta na e universidat segun e tim investigativo ta ‘falta di prioridat’. Falta prioridat riba tantu nivel di enseñansa (instituto, fakultat i programanan di estudio), komo riba nivel di personal i servisio di sosten.

No tin prioridat pa e plan stratégiko. “Tin un plan anual, pero sin prioridat. No tin un plan di diferente aña, ni tampoko un konekshon ku e bùdjèt (finansiamentu) dje instituto, fakultatnan i programanan estudio. E konsekuensia dje falta di prioridat ta, ku ta pone hopi kos pa atendé kuné riba mesa, pero ta ehekutá solamente mitar di nan, òf no ta ehekutá nada mes. E pènel ta yega na e konklushon ku no opstante e kantidat di dokumentonan di maneho ku tin, den e instituto tin poko informashon relevante presente pa por duna guia efektivamente. Ta nesesario pa redusí e kantidat di dokumentonan i nan tamaño, i duna prioridat na e maneho den e dokumentonan dje strategia.”

Prensa

E trahadónan entusiasmá ku e pènel a papia kuné, a duna di konosé ku nan tin nesesidat di prioridatnan institushonal. UoC tin poko relashon na nivel stratégiko di e instituto. “UoC tin un posishon importante komo universidat nashonal. Sinembargo, e universidat no por sòru pa mantené un bon universidat su so i pues sin e yudansa di komunidat di Kòrsou. Ta importante pa e lidernan den komunidat keda para tras di e universidat. E relashonnan ku gobièrnu i prensa no ta bon. UoC mester aktua proaktivamente i ku transparensia huntu ku prensa i gobièrnu.”

Imágen negativo

Segun e rapòrt, ya ta pa algun aña kaba e kantidat di studiante ta bahando, i esaki tin konsekuensia grandi pa situashon finansiero di UoC. “E redukshon den e kantidat di studiante ta parsialmente kousá dor di un imágen no muchu positivo dje universidat. E imágen ménos bon ta kousá entre otro pa publisidat poko negativo, limitashonnan den e fasilidatnan, e kampus bieu i e idea di mayornan ku enseñansa na Hulanda ta mihó. E vèlt ta indiká ku e estudio por ta mas ‘hip’ (atraktivo) tambe.”

Diversidat

E punto di salida di UoC ta union den diversidat. “Sinembargo, e pènel ta konstatá ku no tin union, sino solamente diversidat. Traha huntu, kolaborando riba tur nivel dje organisashon dor di ta responsabel huntu pa desaroyo di maneho, kompartí konosementu, desaroyo huntu ku studiantenan i vèlt di enseãnsa, ta posibel. Pero e ta solamente posibel di forma limitá, mientrastantu e fakultatnan ta primordialisá diversidat i interes propio. Union den maneho i ehekushon di maneho ta nesesario pa operá efisiente i efektivo. Diversidat ta keda reflehá den e diferente programanan di estudio i e konteksto for di kua ta organisá e kuríkulo.”