Famia Plania ta duna servisio henter aña tokante di prevenshon di malesanan seksual i embaraso indeseá.

Willemstad,– Famia Plania ta duna servisio henter aña na skolnan pero tambe e fundashon ta brinda servisio na lokashon mes na kual tur hende di kualke edat por kana yega pa tuma informashon.

Junrianne Wout a kompartí ku ta haña hopi yamada di skolnan den kual ta aserká famia plania durante periodo di karnaval. Stacey Sampson ta enfoká riba ‘outreach’ den kual ta aserká entre otro skolnan i sentronan di bario. Den yanüari a kuminsá bai na diferente skolnan pasobra e skolnan ke prepará e  hóbennan pa ta konsientisá promé ku ta drenta e periodo drùk di Karnaval.  Stacey  Sampson a menshoná ku ta dependé e edat, ta kompartí informashon. Famia Plania ta duna informashon riba petishon pero hopi biaha ta duna informashon na hóbennan ku a kuminsá tene relashon kaba.  

Tin hopi mucha i hóben ku ta aktivo seksualmente kaba segun Stacey Sampson ta splika. Komo trahadó soshal por mira si e mucha òf hóben ta kla kaba pa risibí e informashon di malesa. Na e lokashon kaminda ta duna e informashon ta kambia e tópiko si mester si e hóben no ta kla ainda pa risibí e informashon di malesa òf embaraso indeseá. Por ehèmpel, si e mucha no konosé su kurpa ta papia tokante di esaki promé. Pues a base di e konosementu di e mucha òf hóben, ta bai aleu ku e  tópikonan.

Tambe Stacey Sampson ta kompartí ku mayornan tambe ta aserka Famia Plania pa asina haña yudansa na kon e mayor ta kompartí sierto informashon ku e mucha òf hóben. E fundashon ta habri pa papia di prevenshon ku mayornan ku tin difikultat di papia tokante di malesanan transmití seksual i òf embaraso no planeá. Junrianne Wout a kompartí pa loke ta trata di embaraso, ta enfoká riba prevenshon i konsientisashon tokante di diferente método manera entre otro prikpil, pil, kondon pa hende hòmber i muhé, spiral, pleister, i tambe e implante.

Unabes ku bo ta na estado kaba no por hasi mas segun Junrianne Wout ta splika. Pues no tin un smoesje pa no hasi uzo di algu i prevení un malesa òf embaraso. Konsulta na Famia Plania ta grátis pero si un kliente ke hasi uzo di spiral por ehèmpel, si tin ku paga pe. E sènnan ta bai bek na e trabounan ku Famia Plania ta hasi riba e área di prevenshon.