Famia Plania ta lansa kampana ‘Si bo ta pensa di hasié, kue bo bistié’ durante e periodo di Karnaval.  

Willemstad, — Fundashon Famia Plania ta habri Karnaval ku un kampaña den kual e fundashon ta manda un mensahe durante karnaval pa enfoká riba protekshon.

Junrianne Wout di Famia Plania a splika ku e fundashon lo bai den kayanan di Kòrsou, Marche di Tiner i Marche di Hende Grandi, pa parti protekshon, spesífikamente kondon. Junrianne Wout ta splika ku a skohe temporada di Karnaval pasombra esaki ta un di aktividatnan mas grandi durante kual e fundashon por yega na mas tantu persona. Ta subi kaya ku bon boluntat pa asina konsientisá personanan di malesanan transmití seksualmente i tambe embaraso indeseá.

Junrianne Wout a kompartí ku den e periodo karnaval pasombra hopi hende lo ta bai ta bou di influensha i esaki por hiba na akshonnan ku por trese malesanan transmitími i òf embaraso indeseá. Lo subi ruta di Karnaval ku 25 boluntario. Lo kuminsá djabièrnè aki na ISA i despues lo kaba na rotònde di Renassaince.  E di dos dia, djadumingu, lo kuminsá parti protekshon na Pizza Hut i despues kaba na ISA. Ta kana e promé mitar i despues e segundo pasombra ke pa tur hende risibí protekshon.

Famia plania lo bai partisipá na e promé evento di Karnaval kual ta e jump in di Haké. Stacey Sampson di Famia Plania a kompartí ku normalmente hende ta hopi reseptivo pa tuma e protekshon. Hopi hende ta hasi pregunta tambe. Stacey Sampson a kompartí ku lo tin ekspertonan tambe ku ta kana riba ruta pa duna informashon pues asina tur hende sa ku por tuma informashon i tur ta wèlkòm pa hasi esaki. Lo parti dos condoom pa persona. Ofisina di Famia Plania lo ta sera dia di karnaval pero despues di dia di Karnaval por haña kondon nan na ofisina pa un speshal di NAf.  5,50 pa 12 kondon.

E ofisina di Famia Plania ta situá riba ruta di marcha, den bògt di Misa Santa Famia i tur hende ta wèlkòm pa pasa tuma informashon. Por sigui Famia Plania riba wèpsait, Instagram, i tambe Facebook. Pa loke ta trata trabounan boluntario Junrianne Wout a kompartí ku hopi hende a reakshoná pa partisipá pero lástimamente no tin mas luga awor aki. Otro aña e personanan ku ke hasi trabou boluntario por partisipá atrobe.  Por tuma kontakto ku Famia Plania pa kualke informashon via Whatsapp +5999 511 1323.