Damen Shiprepair Curaçao

WILLEMSTAD – Parlamento lo reuní dia 15 di ougùstùs próksimo atrobe pa “Deliberashon ku Minister di Desaroyo Ekonómiko, Gerensia di Damen Shiprepair Curaçao i Gerensia di CDM Holding N.V., tokante e último desaroyonan na Damen Shiprepair Curaçao”. Lo reanudá e reunion 9’or di mainta. Pero te ainda Parlamentarionan ainda no a risibí e kontestanan di Minister Ruisandro Cijntje por eskrito, ni no a haña e oportunidat pa mira e konseshon di Damen, manera palabrá durante reunionnan anterior.

A skòrs e reunion tantu riba 14 di mart komo 6 di yüli último, despues ku frakshon di MFK na 19 di ougùstùs aña pasá a hasi un petishon pa un reunion públiko, pa atend’e ku e último desaroyonan na Damen Shiprepair Curaçao. Motibu di esei tabata ku na luna di aprel 2022 Damen Shiprepair a retirá 78 empleado, pa kumpli ku un plan di rekuperashon pa e astiyero. Durante dje reunionnan anterior a keda diferente pregunta dje Parlamentarionna sin kontesta, debí na e echo ku Minister Cijntje a indiká ku ta trata di preguntanan ku mester ta dirigí na e Minister di Desaroyo Sosial, Labor i Bienestar, Ruthmilda “Mimi” Larmonie-Cecilia. A skòrs e reunion riba petishon di miembronan di Parlamento pa haña posibilidat pa por mira e konseshon, haña informashon riba e petishon ku Damen Shiprepair Curaçao a manda pa gobièrnu riba entre otro fleksibilisashon laboral i tambe pa Minister Larmonie-Cecilia kontestá e preguntanan relashoná ku asuntunan laboral.

Despues riba 7 di yüli frakshon di MFK a manda un karta pa Presidente di Parlamento Charetti America-Francisca (firmá pa Maria Nita, Fergino Brownbill i Juniël Carolina) pidiendo pa kòrda e Ministernan konserní pa suministrá tur informashon, promé ku kontinuá ku e segundo tanda dje reunion. E reunion akí ta sigui pues otro luna, pero ainda nada. Konforme nan petishon a pone e reanudashon dje reunion riba agènda despues di e periodo di reseshon. Pero nan ke tambe pa e Presidente rekordá Minister Cijntje pa manda e kontestanan duná den e promé tanda por eskrito, konforme e desishon di Parlamento. A pidi e Presidente pa rekordá e Minister ademas pa fiha un fecha i lugá pa haña posibilidat pa por mira e konseshon entre gobièrnu i Damen Shiprepair Curaçao, manera Parlamento a disidí ku mester pasa. Tambe nan a pidi pa Minister Cijntje pone e karta publiká den prensa “Verzoek aan de Curaçaose overheid voor continuïteitswaarborging van Damen Shiprepair Curaçao” ku Damen Shiprepair Curaçao a manda pa gobièrnu, na disposishon di Parlamento.