E koperativa FEKOSKAN a lansa su seri di Podcast ‘Kooperativa, é alternativa’.

PUNDA – Kooperativa Fekoskan a lansa un seri di podcast yamá ‘kooperativa, é alternativa’. Durante e promé episodio ku lo keda publiká riba página di YouTube i Facebook di e kooperativa awe, djasabra 15 di aprel 2023, nan lo elaborá riba diferente tópiko i e importansia di kooperativanan den komunidat.

E seri di podcast di Fekoskan, yamá ‘kooperativa, é alternativa’, lo keda produsí i publiká kada kuartal, kual ta nifiká ku kada 3 luna nan lo lansa un episodio ku tin e meta pa konsientisá, informá i eduká un i tur riba e konsepto i benefisionan di kooperativa i dikon kooperativa ta importante pa un komunidat.

Partisipantenan den e promé episodio tabata entre otro, e gerente general di Fekoskan, Eldrid Fos, huntu ku Dennial Daal, kende ta tesorero di Fekoskan i alabes Audit Manager di ACU i Earlrich Lourens, gerente di Kooperativa KEP.

Pa kuminsá Eldrid Fos a splika riba e definishon di un kooperativa. El a indiká ku 

un kooperativa ta un asosiashon outónomo di hende ku ta kooperá boluntariamente pa satisfasé nan nesesidatnan i aspirashonnan ku nan tin komun den tereno sosial, kultural òf ekonómiko. Ta hasi esaki pa medio di un empresa ku nan ta manehá i kontrolá di un manera demokrátiko.

Den un kooperativa, miembronan típikamente ta kombiná nan rekursonan pa logra e meta komun. Esaki por enserá produkshon òf distribushon di produkto òf servisio, kompra i benta di produkto òf servisio, provishon di akseso na bibienda, edukashon, kuido i otro benefisionan.

Kooperativanan ta basá riba prinsipionan di membresia boluntario, kontròl demokrátiko di miembronan, partisipashon ekonómiko di miembronan, outonomia i independensia, edukashon, koperashon entre kooperativanan i preokupashon pa komunidat.

Durante di e podcast FEKOSKAN a elaborá riba diferente otro tópiko interesante manera e bentahanan di un kooperativa, dikon un kooperativa ta ganando popularidat, kon kooperativanan ta benefisiá sosionan i tambe e benefisio ku un kooperativa tin pa komunidat.

Pa mas informashon tokante e tópikonan menshoná ariba, sintonisá e promé episodio di e podcast di Kooperativa Fekoskan riba nan página di YouTube @FeksokanCooperative i Facebook @Fekoskan.