Sosial: e “oferta” sosial di van Huffelen a keda rechasá na último momento. Konsekuenshanan sosial di ménos penshun, tei kousa prekupashonnan makro ekonómiko na Hulanda. Ménos Penshun, ménos empleo na Kòrsou ta nifiká mas emigrashon pa Hulanda.

Punda- E desishon pa tuma un fiansa pa skapa Ennia, lo tin bastante konsekuensha a largo plaso pa Kòrsou. Aparte di lo ta pagando un debe sin produkshon, Kòrsou ta kore riesgo di surpasá e stándar normativo di interes, saliendo for di punto di bista ku lo aparte di Ennia, Kòrsou lo sigui fia pa e.o desaroyo ekonómiko.

E “oferta” di Hulanda (via van Huffelen) pa fia por lo ménos 700 mion, ta un oferta atraktivo pero no pa finansiamentu di un debe no produktivo. Pa Gobièrnu, e rechaso ta nifiká ku tin e bentaha di por sigui fia bou di e Lei di Reino Finansiero (Rft). Pero e espasio pa fia, na 1.2 miar florin ta un oferta pa pensa riba dje pasobra bo ta kuminsá bati na porta di e stándar Normativo imponé den e Lei di Reino Finansiero. Mester tene kuenta ku pa den futuro e nivel di interes por òf ta bai subi, kousando ku Kòrsou yega na e stándar Normativo di Interes.

E rechaso di e oferta, tambe tin su konsekuenshanan. Gastunan Normativo (supsidio ets) mester keda priorisá, pero segun Kámara di Kontrolaria General tin espasio pa hopi mas tantu efisiensia finansiero riba presupuesto estatal. Entre otro, e Kámara a apuntá ku tin por lo ménos 52 fundashon ku no ta kumpliendo ku reglanan di kompatibilidat. Ta trata di un suma di kasi 15 pa 20 mion anual ku Gobièrnu por skapa. Referiendo bek riba e gastunan normativo, si Gobièrnu no logra kòrta riba gastunan sekundario, mester kòrta den gastunan primario manera e.o. salubridat, enseñansa, deporte, kultura, empleo, seguro sosial, stimulashon ekonómiko ets. Ets. Ta un hecho ku si no logra skapa gastu pa finansiá Ennia, e kota di impuesto lo ta oumentá.

Manera ta konosí un komishon instalá tin ekspertonan internashonal  sostené pa Delloitte & Touche huntu ku aktuario internashonal Phenox a yega na dos senario pa Ennia. Sea ta “Run Off” Ennia Caribe Leven òf ta hasi un Kontinuashon Nobo, pa lora skapa e empresa di seguro mas grandi riba teritorio ulandes den Karibe. E desishon tabata den man di Kabinete Pisas. E intento pa un resolushon a yega despues ku intentonan di korte pa partidonan yega na otro pafó di korte, no a logra yega na un entendimentu. Pendiente mas ku 10 desishon den korte, e Komishon Resolushon Ennia a yega na dos konseho, kual sea fo’i saku robes òf esun règts, e yu di Kòrsou mester bai paga.

A opta pa skohe pa e senario di desalokashon, esta “Run Off”. Den e senario di “run off”, ta kalkulá ku tenedónan di pólisa ta bai pèrdè mas ku 80% di nan derechinan riba penshun. E deskuento ta basá riba e situashon finansiero aktual na Ennia. Den e senario di Run Off, mester tene kuenta alabes ku e deskuento ku mester bini si akaso opta pa bende e aktivo (balorá na bolsa di penshun) i na kua preis esaki ta keda negoshá. Lokual e komishon ta splikando ta ku mas deskuento duna riba e balor di e bolsa mas atraktivo e ta bira pa kumpradónan, pero e tenedó e polisial su balor ta baha konsiderablemente. Den e senario di Run Off, gobièrnu di Kòrsou su kontribushon ta bira entre 600 mion pa 1.2 miar florin repartí riba 25 aña. Ekspertonan ta kalkulá un peso di likides di por lo ménos 35 pa 50 mion anual. No ta spesifiká si esaki ta inkluso interes.