UTRECHT—Ku e pobresa den Hulanda tabata historikamente abou den 2022, e fondo di Pobresa no ta mira den praktika.

Asina e fondo a reakshoná riba e sifranan resien di pobresa. Segun e kalkulashonnan di CBS 3,8% di poblashon tabatin risiko di kai den pobresa. Esaki ta menos ku e 5% di 2021 i e nivel mas abou for di 1977. Sosten di entrada a kontribui na e bahada. Pero e fondo di Pobresa ta mira ku e kantidat di petisonnan serka instanshanan sosial a oumentá. Apesar di ta kontentu ku e ekstra medidanan di gabinete a yuda hopi, no por lubida ku e sifranan no semper ta duna un bista kompleto di e realidat pa hendenan ku ta biba den pobresa, segun e fondo. For di investigashon ku a ehekuta na mei ta indiká ku 64% di organisashonnan di asistensia lokal, manera banko di alimento, a mira un oumento di petishonnan. E fundashon ta teme ku pobresa ta oumentá ora e medidanan kai afó. Asina e plafont di preis pa gas i koriente lo keda eliminá den 2024. E fondo ta hasi yamada pa un esfuerso kordiná pa kombatí pobresa den Hulanda.