Aktualmente tin 18.673 persona na Kòrsou ku ta biba bou di nivel di pobresa. Di esaki, 8.5 % ta dependé primariamente di ònderstant.

Willemstad, —  Den futuro lo ke pa ònderstant yega na 70 porshento di salario mínimo. Pero riba tèrmino korto ke un oumento di 30 porshento pa solteronan i 52 porshento pa personanan ku ta kasá.

Den un karta di minister Larmonie-Cecilia, minister di SOAW ta indiká ku poko poko lo ke pa ònderstant yega na 70 porshento di salario mínimo. Esaki ku tempu pa asina kombatí pobresa. Riba tèrmino korto ke un oumento di 30 porshento pa solteronan i 52 porshento pa personanan ku ta kasá. Banda di esaki minister di SOAW ta informá ku mester ta posibel pa personanan ku ta kobra ònderstant pa traha kobra salario mínimo, sin ku ta retené sèn for di lokual e kobradó di ònderstant ta kobra riba su ònderstant.

Ta importante pa e kobradó di ònderstant kontribuí na e merkado laboral kaminda tin nesesidat pa trahadó. E meta ta ku e kobradó di ònderstant, no kobra ònderstant mas na momentu ku e haña un trabou ku ta paga mas ku salario mínimo. Pues e oumento di ònderstant  mester kondusí na kombatimentu di pobresa. Aktualmente tin 18.673 persona na Kòrsou ku ta biba bou di nivel di pobresa. Esaki ta 31.9 porshento di kasnan di famia na Kòrsou ku ta biba den pobresa. Mas ku mitar, pues 53.4% di e famianan pober ta dependé primariamente di AOV i esaki ta un kantidat di 9.971 di famianan pober. 

Di e famianan pober 8.5 % ta primariamente dependiente di ònderstant. 29.6 % di e famianan pober ku ta dependiente di labor òf komersio komo fuente di entrada, no ta gana sufisiente pa surpasá e nivel di pobresa. Biba bou di e linia di pobresa ta nifiká ku un individuo òf un famia tin un entrada i rekursonan ku no ta sufisiente pa kumpli ku nan nesesidatnan básiko pa un stándart di bida konsiderá komo akseptabel. Hende ku ta biba bou di e linia di pobresa frekuentemente ta enkontrá nan mes ku retonan ku edukashon, kuido médiko, i otro servisionan ku ta esensial.