Promé ku e pandemia, mas o ménos un di kada tres famia na Kòrsou ya tabata biba bou di e linia di pobresa kaba, segun informashon di Sociaal Economische Raad Curaçao (SER).

Willemstad, — Segun estudionan 1 den 3 kas di famia ta biba den pobresa. Esaki tabata un situashon promé ku pandemia di Covid.

E pandemia di COVID-19 i e krísis di kosto di bida a pone na kla e fragilidat finansiero di famianan. “Kòrsou ya tabatin un ‘problema di pobresa enorme’ – i corona a hasi esaki ainda mas grandi.” Esei ta e título di un artíkulo ku a aparesé den de Volkskrant na fin di 2020. E krísis di COVID-19 ta bai hopi mas leu ku ta ‘so un otro krísis’ i ta resaltá e problemátikanan ku ya tabata eksistí, manera pobresa. Promé ku e pandemia, mas o ménos un di kada tres famia na Kòrsou ya tabata biba bou di e linia di pobresa kaba, segun informashon di Sociaal Economische Raad Curaçao (SER).

Pobresa ta komun bou di penshonadonan, esnan sin trabou, famianan ku muhé komo kabes di famia, i esnan ku tin un nivel di edukashon abou. Evidensia for di otro paisnan ta sugerí ku un kantidat di famianan ta tuma desishonnan finansiero no sabí. Hopi biaha kas di famia no tin sèn di spar pa retiro, tin muchu debe, i no tin reservanan pa situashonnan di urgensia, poniendo nan den desbentaha finansiero adishonal. E linia di pobresa pa un kas ku un persona tabata NAf. 1,249 na 2018.

Na aña 2016 CBS a hasi un investigashon di bùdget di kasnan kaminda a traha un lista di pregunta apart den kual a puntra respondentenan pa nan opinion di nan situashon di bida. Akinan a hasi respondentenan pregunta tokante satisfakshon di bida i nivel di bienestar di e kas. Tambe a puntra respondentenan pa nan opinion tokante di kiko nan ta konsiderá komo un  salario mínimo sufisiente pa por bini rònt kuné kada luna. Den e investigashon aki CBS a enfoká riba pobresa suphetivo na Kòrsou den aña 2016. No a hasi investigashon di pobresa ophetivo, kual ta un investigashon basá riba opinion di ekspertonan.

Pobresa suphetivo ta ora respondentenan mes ta duna nan opinion tokante e situashon di nan kas relashoná ku e nivel di bienestar (si tin pobresa òf no). For di e investigashon aki a sali dilanti ku e kas di famia mas pober ta esnan ku ta konsistí di solamente un adulto huntu ku un òf mas yu. Ku respekto na edat di e persona ku ta dirigí e kas di famia, ta mustra ku kas di famia ku ta wòrdu dirigí pa personanan mas hóben (15-24 aña) i esnan ku ta wòrdu dirigí pa personanan di 65 òf mas, ta mas pober segun estudio di pobresa suphetivo. Kas di famia ku ta wòrdu dirigí pa muhernan ta paresé di kai bou di e nivel suphetivo di pobresa mas frekuentemente.