Back to Top
Responsive image
E korant di pueblo

Frakshon di MAN ta splika dikon a vota kontra di presupuesto


December 7, 2021 • 1 minüt pa lesa

Willemstad, — Frakshon di MAN den tratamentu di presupuesto djabièrnè último a bai kontra di e presupuesto. Esaki ta pa motibu ku tin diferente aspekto den e presupuesto ku no ta reflehá adelanto di pueblo. Banda di e echo ku CFT mes ta indiká den e presupuesto ku esaki no ta na òrdu, e presupuesto ta kontradesí e maneho di e gobièrnu i sigur e nota di kambio ku nan a presentá. 

Motibunan prinsipal pa MAN ta ku e gobièrnu aktual ta purba pa haña entrada dor di oumentá kosto di bida i kòrta den kalidat di kuido di nos hendenan. Den presupuesto gobièrnu a pone di bai kobra “invoerrechten” riba gasolin. Esaki ta algu ku nunka ántes a konosé. E kobransa aki ta nifiká ku lo bini un komponente  mas di gastu  den preis di kombustibel. Esaki lo tin komo konsekuensia ku kosto di bida lo subi.

Otro punto ku pa Frakshon di MAN ta motibu pa vota kontra e presupuesto ta e kortenan den salubridat ku Gobièrnu ke trese ku ta bai afektá kalidat di kuido di nos pueblo. Tambe Oumento di OB na un tarifa di 7% i eliminashon di e dedukshon di 50% di OB na entrada, no ta sigur ku esaki lo wòrdu introdusí si òf no. Esaki debí ku minister den su presupuesto ta papia di esaki. Pero tambe den e konseho di CFT riba e presupuesto i su nota di kambio ta bini dilanti. Frakshon di MAN a keda konsistente den su posishon riba e presupuesto, i ta di opinion ku esaki no ta reflehá adelanto di pueblo. Tur e puntonan ariba menshoná tabata e motibunan prinsipal di Frakshon di MAN pa vota kontra  di e presupuesto 2022.

Login