WILLEMSTAD – “Gobièrnu a krea un fondo pa e sektor di peska por a hasi un petishon finansiero nan momento ku esaki ta nesesario?” Esei ta un dje 8 preguntanan ku Frakshon di MAN, den persona di su lider Giselle Mc William ta hasi den un karta dirigí na Minister di Asuntunan General enkargá ku Medio Ambiente i Naturalesa Gilmar Pisas.

Segun Mc William, Frakshon di MAN ta para igualdat i inklushon pa tur gremio den komunidat. “Pues tambe pa e sektor primario di peska, krio di bestia i agrikultura.” E Frakshon a trese dilanti kaba resientemente ku nan ta boga pa un fondo pa e sektor primario akí unda di un manera transparente i a base di igualdat ta krea oportunidatnan konkreto, pa e sektor akí duna un kontribushon real i balioso na ekonomia. I tambe na salú públiko, pa medio di produktonan saludabel pa konsumo.

T’asina ku Frakshon di MAN a hasi bishita na Banda Abou despues ku e mal tempu resien a asotá nos kosta sùit. “Despues di e rekorido akí a manda un karta i pidi Minister pa krea un fondo unda piskadónan por hasi un petishon den kaso di kalamidat òf nesesidat pa invershonnan pa nan por ehekutá nan trabou komo piskadó. Nos a tuma nota entretantu ku dia 7 aprel último gobièrnu a otorgá 10 piskadó botonan nobo ku motor. I nos ta kontentu ku despues di 3 aña porfin gobièrnu ta duna e sektor akí maske ta un tiki atenshon.”

Pero Frakshon di MAN den e kuadro akí ta haña diferente pregunta di otro piskadónan kon nan tambe por bini na remarke pa por haña un boto ku motor. “Nos ta kere i ta di opinion ku mester promové e sektor primario den produkshon di nos propio kuminda, ku tambe lo yuda den baha den importashon di kuminda. E bahada ta nifiká tambe ku menos divasa lo sali for di pais.” Basá riba tur esakinan i konforme artíkulo 96 di Reglamentu di Orden di Parlamento, Frakshon di MAN ta hasi gobièrnu 8 pregunta.

Aparte di ke sa si gobièrnu a krea un fondo p’e sektor di peska, e Frakshon ke sa unda e 10 piskadónan ku a risibí boto ku motor nobo a registrá, kon a skohe e 10 piskadónan akí i sí otro piskadónan na Kòrsou tambe por registrá pa haña un boto ku motor nobo. Ademas: “Ta posibel pa kumpra mas boto ku motor pa otro piskadónan? For di kua fondo a saka sèn pa kumpra e 10 botonan ku motornan? Minister por splika esaki? Kuantu sèn e 10 botonan ku motor a kosta? Ta posibel pa krea fondo pa otro personanan ku ta funshoná den sektor primario pa risibí material pa sigui eheresé e trabou, promoviendo produkshon di nos propio kuminda?” Minister Pisas tin 2 luna di tempu pa kontestá e preguntanan akí.