Frakshon di MAN kier klaridat pa e grupo di trahado ki ta e plan realmente pa e kompania. Pero tambe e trahadonan ku tin un preokupashon grandi pa loke ta futuro di nan trabou.

WILLEMSTAD,–CIS (Curaçao Industrial Services N.V.) a ser lanta na 1988 i ta un kompania afiliado di CDM Holding NV (CDMH) kaminda CDMH ta 100% akshonista di CIS. CIS ta hasi e siguiente aktividatnan:

1. Drecha motor industrial (wikkel motor eléktriko) den nan shòp. E motornan ta bini di prinsipalmente Damen i tambe di Refineria, Aqualectra i otro kompanianan ku tin motor i generator industrial.
2. Hasi trabou eléktriko, instrumentashon i kooling na Refineria
3. Hasi trabou di instalashon i mantenshon di e infrastruktura di kabel i meternan pa Aqualectra.

CIS, durante añanan a logra tene kabes riba awa ku algun aña bon i algun ménos bon, pero sin intervenshon di CDMH. CIS resientemente a wòrdu konfrontá ku diferente reto, ku tabata rekerí asistensia di CDMH. Retonan ku entre otro a resultá ku:

• E negoshi ku ISLA no ta kumbiní, pasombra CIS mester pone sèn èkstra pa sali for di gastu di su trahadónan.
• E negoshi di Aqualectra tampoko no ta negoshi, e tarifanan ku Aqualectra ta dikta riba e kompanianan ku ta traha p’e ta leu for di sufisiente.
• E edifisio di CIS a wòrdu konstruí muchu karu, i CIS tin hopi problema pa paga e fiansa na VidaNova penshunfund.

CIS tabata riba e trayekto pa resolvé e problemanan ku a konstatá i ta dokumentá den su “Businessplan”. CIS a papia ku Refineria i Aqualectra. Ku Aqualectra e kombersashonnan ta riba bon kaminda, te ku Aqualectra a keda di adaptá su tarifanan pa hasi nan mas realístiko. Refineria/CRU tambe a primintí ku awor ku nan ta bai hasi trabou pa Global nan por paga e tarifanan normal. Apesar ku ta kana e kaminda pa logra resolvé e problemanan, CIS ta wòrdu konfrontá ku e siguiente retonan agudo:

• Kambio di bestür di CDMH.
  For di 1 sèptèmber CIS tin un direktor nobo i e direktor saliente a baha ku vakantie i aansluitend penshun for di 6 di sèptèmber 2023 i no a wòrdu permití pa keda “werk-in” e direktor nobo. Ta parse e direktor nobo di CDMH a bini ku un mandato kla di

akshonista, sigur pa loke ta CIS, esta esun di Minister enkargá ku CDMH, ku CIS tin ku wòrdu será!

• Konsehero finansiero di CDMH
  E konsehero finansiero di CDMH ku ta konsehá pa e afiliadonan di CDMH i tambe ta tene buki pa otro kompania. A resultá ku e otro kompania ta interesá di tuma CIS over, pero ora e ta na preis di likidashon, kiermen di ora CIS ta fayit. 
• General Manager nobo
  CIS a atkerí un General Manager nobo, ku tabata hasi un tremendo trabou e último aña i mei pa purba reskatá e kompania, pero e direktor nobo di CDMH no a prolongá su kontrakt i a mand’e kas di un dia pa otro. E direktor nobo CDMH mes lo bai manehá CIS.

Mirando e preokupashon bou di trahadonan, pero tambe nan famia Frakshon di MAN a hasi e siguiente preguntanan na Gobièrnu, dirigi na minister di Desaroyo Ekonomiko

1. Minister ta na altura di e retonan agudo ku CIS ta wòrdu konfrontá ku ne?
2. Ta bèrdat ku Minister ke pa CIS bai fayit?
3. Si e kontesta ta Si, Minister por splika dikon?
4. Si e kontesta ta No, Minister por splika dikon no ta sigui ku e “business plan” pa wak si CIS ta viabel si òf no promé ku lag’e bai fayit?
5. Minister ta na altura ku e konsehero finansiero di CDMH por tin un konflikto di interes ora ta trata CIS?
6.  Dikon Minister no ta laga un instansia imparsial (p.e. BAB òf SOAB) chek e sifranan di CIS, pa kita tur duda di un posibel konflikto di interes pa ku e konsehero finansiero di CDMH?
7. Ta konosí ku e General Manager di CIS ta hasiendo un bon trabou. Bou di mando di e General Manager nobo tin e siguiente desaroyonan:
   1. Aqualectra a bai di akuerdo pa tarifanan nobo, mas realístiko.
   1. Aqualectra ta laga CIS hasi hopi trabou debí na e retonan ku e otro 2 kompanianan, ku por hasi e trabou ku CIS ta hasi, tin na e momentonan aki. 
      E kantidat di trabou ta pone ku CIS tin ku hasta buska mas trahadó pa kumpli ku demanda di trabou di Aqualectra.
   1. Tambe CIS ta den e proseso ku diferente oro kompanianan pa ekspandé nan posibilidat pa trabou, entre otro na WEB-bonaire.
   1. CIS a keda kla ku e claim ku e tabata tin ku Aqualetra di 1.5 mion, i a haña mitar di esaki na Augustus 2023 i e otro mitar na 2 di Òktober 2023.
      Apesar di tur e kosnan positivo aki, dikon no a kontinuá ku e General Manager?
8. Awor ku no a kontinuá ku e General Manager, ta e Direktor nobo di CIS mes lo okupá e funshon di General Manager? E dos funshonnan aki ta kompatibel?
9. Ki solushon òf plan tin pa e 58 trahadónan (Tata i Mama di famia) di CIS, ora dal CIS será?