Giselle Mc William a splika ku ta e a aserka Suzy Camelia Romer promé pa yega na un aliansa entre MAN i PIN

Santa Maria,– Durante di un rueda di prensa ayera e lidernan di partido MAN i di partido PIN ofisialmente a anunsiá e aliansa di e dos partidonan ku lo keda komo dos partido, pero lo bai elekshon ku un lista kombiná ku lo keda enkabesá pa sra. Giselle Mc William.

Miembro(nan) di Konseho di partido Partido MAN i partido PIN den nan respektivo reunion selebrá djasabra 11 di novèmber ultimo, ámbos di forma unánime i pa aklamashon a disidí pa próksimo elekshon pa Parlamentu, partisipá ku un lista konhunto. Ámbos partido por lo pronto ta keda entidatnan hurídiko independiente ku nan propio struktura i liderazgo di kada partido. Sinembargo, e kombinashon MAN-PIN ta bai elekshon ku un (1) programa di elekshon, un (1) lista di kandidato, liderazgo di kampaña i un (1) ”lijsttrekker” determiná konhunto. E “lijsttrekker” di e lista konhunto MAN-PIN ta señora Giselle Mc William.

Pues e lider polítiko aktual di partido MAN lo keda postulá komo kabesante di e lista konhunto i e lider polítiko aktual di partido PIN lo keda postulá komo number dos riba e lista konhunto. Partido MAN lo okupá 17 i partido PIN 12 di e posishonnan riba lista, segun e anekso na e kombenio aki. Kada partido lo proponé e kandidatonan pa subi lista na momentu debido.

A base di resultado di ultimo elekshon partidonan a yega na un akuerdo ku MAN ta presentá 17 kandidato i PIN 12 kandidato pa forma e lista konhunto di 29 kandidato. Kada partido ta keda responsabel pa selektá i presentá nan mihó kandidatonan a base di kriterionan ku partidonan akordá ku otro. Partido MAN lo tin 6 kandidato den e promé 10 nan i PIN lo tin 4 kandidato riba lista den e promé 10 nan.

Meta di e kolaborashon aki ta pa uni forsa polítiko i pa frena divishon i fragmentashon den polítika i tambe den nos pueblo. Ku e union aki e partidonan ta pone un base fuerte pa gana konfiansa di pueblo. E problemanan aktual di e.o. pobresa, desempleo, enseñansa, salubridat ku listanan largu di espera, eskases di bibienda, infrastruktura, transporte públiko, violensha doméstiko, komportashon di hóbennan, nesesidat di adulto mayor, kuido di nos grandinan, kresiente desigualdat i krísis klimatológiko, ta rekerí union, forsa di akshon i inovashon pa logra solushonnan sostenibel i duradero.

Pa garantisá ku e proseso promé, durante i despues di elekshon ta kana di forma koherente, ta bai tin un unidat di maneho di koperashon konsistiendo di lider polítiko i presidente di kada partido huntu ku un sekretariado.

Segun e lider polítiko Giselle Mc William, partido MAN i partido PIN ta kere firme ku traha huntu ta hasi partidonan mas fuerte. Sigur ora fo’i un análisis profundo hasí di ultimo elekshon ta resultá ku:

– Elekshon 2021 tabatin 23 partido polítiko ku a presentá lista pa partisipá na elekshon: Mas tantu partido ku tin asiento (21) disponibel.

– 16 partido a bai pre-elekshon i di kua 8 a haña sufisiente sosten pa por a partisipá.

– Na final, 15 partido a partisipá na elekshon di 19 di mart 2021 di kual solamente 6 a logra saka 1 òf mas asiento.

– 9 partido no a logra saka asiento pero huntu tabatin 24,520 voto, esta mas ku 25% di esnan ku a vota. Esaki a influenshá repartishon di kantidat di “restzetels” (9 total, algu nunka bisto).

Kòrsou tin basta tempu ta anhelá pa union real. Partidonan MAN i PIN ke inspirá sobránan pa sigui e kaminda aki. Esaki ta djis e komienso.