Segun OM e no tabatin niun intenshon kriminal i no a benefisiá niun kompania òf fundashon!

WILLEMSTAD—–Despues ku algun polítiko ku e meta pa kibra Suzy Römer a hiba un kampaña insistente i fuerte pa vários aña pa daña nòmber di Suzy Römer i ku e meta polítiko a hasi alrededor di 15 keho kontra di su persona na Landsrecherche, e último aki bou di enkargo di Ministerio Públiko a investigá e kehonan pa kasi 3 aña.  Ministerio Públiko no por a yega na otro konklushon ku no tin ningun motibu pa persiguí Suzy Römer. 

Pa klaridat Partido Inovashon Nashonal (PIN)  ta informá ku riba su  ‘deklarashon komo kandidato pa bira minister’, Suzy a yena sigur un 10 persona hurídiko den kua e tabata aktivo anteriormente di kua e gran mayoria tabata fundashonnan den kua e tabata fungi komo boluntario, pues sin niun klase di pago. Na momento di bira minister mayoria di e entidatnan no tabata aktivo i/òf Suzy no tabata aktivo den niun di nan.  

Formador di e tempu ei por a haña un bon bista riba e aktividatnan ku Suzy Römer tabata tuma parti den dje i no tabatin ni un remarke ku Suzy mester a tene kuenta ku ne.

A resultá den e investigashon intenso di landsrecherce ku Suzy Römer a lubidá di menshoná un (1) fundashon ku yama ‘Julius Leeft’ di John Leerdam ku tabata trese obranan teatral Kòrsou, i den kua ela partisipá den e direktiva sin niun klase di pago òf interes personal. E fundashon aki ya no tabata aktivo mas pa años ora Suzy a bira minister.

Ademas landsrecherche a bai bèk den tempu te 2015 ora Suzy a bira minister di VVRP, pa konstatá ku un kompania di kua Suzy Römer a traspasá su akshonnan for di 2013, pues promé ku e la bira minister na 2015, i ku ta registrá pa medio di un notario, ku e dirigentenan di e kompania – pues no Suzy- a kometé di skrap su nòmber na Kamara di Komersio te algun luna despues ku e la bira minister di VVRP na 2015.  Pa PIN ta inkreibel ku riba un deklarashon pa bira minister di 2017 lo mester menshoná un kompania ku e persona a sali for di dje promé ku e bira minister i ku e direktiva a saka su nòmber for registro di Kamara di Komersio na 2015!

Tambe via media por konstatá ku tin hende ku no kier komprondé ku ora registrá un hecho ta registrá fecha ku e hecho tuma lugá, i ta firma e día ku bo registra. E dos dianan aki no nesesariamente te meskos. Si bo registrá un yu ku a nasé día 14, bo ta registrá ku e yu nasé día 14 anto e día di “op” e yu ta 15. Den e kuadro aki ta bon pa suprayá ku Suzy no tabatin niun otro funshon banda di su funshon komo minister. Un konklushon ironeo ku algun ta pretendé di saka for di e komunikado di Ministerio Públiko.

Kemen kiko a sobra di e avalancha di akusashonnan ku prinsipalmente kontrinkantenan polítiko  a bin ta entregá for di 2017 te ku 2020 kontra di Suzy Römer?

1.  Ku e la lubidá di mèldu un (1) fundashon ku tabata trese obranan teatral pa pueblo i  ku ya tabata inaktivo pa algun aña kaba i for di kua e no a gana ni un sèn pretu.

2. Ku na 2017 e no a mèldu un kompania for di kua e la sali kuater aña promé, esta na 2013, lokual ta registrá pa notario, i for di kua na 2015 e kompania a saka su nòmber for di e registro. Ken lo a mèldu esei realistikamente mirá?

3. Ku Ministerio Públiko mes ta konstatá den un karta dirigí na Suzy Römer ku no tabatin niun intenshon kriminal i ademas no a benefisiá niun kompania òf fundashon ku Suzy Römer a partisipá den dje.

Ta p’esei ta hopi di lamentá ku netamente e argumento aki, ku ta esun mas prinsipal i ku ta pretu riba blanku den e karta di Ministerio Públiko no a keda ripití den e komunikado di prensa di Ministerio Públiko.