Suzanne Camelia Römer

PUNDA- Den un komunikado Partido PIN ta bisa di a keda babuká di tende kon, despues di reklamo di un miembro, presidente di staten, manera nada no a pasa, a deklará ku maske kon importante òf aktual e tópiko ta, sa tarda pa yama reunion paso agènda di minister i Parlatino no ta permití.

Sinembargo ta bon pa komunidat sa i pa presidente di parlamento kòrda ku artíkulo 64 di parlamento su reglamentu di òrdu ta stipulá ku ta tene reunion denter di 14 dia despues di petishon. Segun PIN, e deklarashonnan di direktor di CPR den media lokal a proba e urgensia pa staten reuní riba Refineria Isla. E lider di frakshon di PNP a asta roga presidente di parlamento pa buska grabashon di un entrevista radial pa usa komo prueba ora parlamento ta trata e asuntu.

Ta straño si ku e mes lider di frakshon ei, apesar di su afan di ta dualista, a laga presidente di parlamento tira e reunion riba Refineria Isla i Grupo GIK te leu den luna di yüni. Ta mas straño ainda tende presidente di staten purba splika ku un reunion importante asina no por tuma lugá mas prome paso tin ku bai Parlatino, tin ku bai IPKO i paso gobièrnu no tin tempu. Ta parse ku terseranan a sekuestrá e agènda i libertat di reunion di e máksimo representashon di pueblo.

Partido PIN ke pa komunidat kòrda su representantenan ku artíkulo 64 di Reglamentu di Òrdu di parlamento ta bisa klaramente ku reunionnan pidí segun regla, mester tuma lugá den 14 dia. Biahe pa Parlatino no por ta argumento pa desviá paso e parlamentario su prioridat mester ta na Kòrsou. Agènda di gobièrnu tampoko por ta motibu pa desviá fono parlamento su ròl di kontroladó ta keda redusí na sero. PIN ta pidi parlamento, su presidente i spesialmente koalishon pa tuma e papel di kontroladó i representante di pueblo na serio. Esaki no mester nifiká guera públiko den koalishon. E mester nifiká si ku ta hasi palabrashon pa por  yama reunionnan importante i aktual den e tempu stipulá ya pueblo ta haña e klaridat ku e meresé.