Willemstad——Aserkando e Dia Mundial di Limpiesa, World Clean Up Day 2023, djasabra awor 16 di sèptèmber, e wikènt  aki tabatin un limpiesa grandi na Klein Kòrsou.

2 dia largu un tim di boluntario a traha duru limpiando e plèstik ku ta subi tera, palu, sargassum na e parti nort di e isla. E material nan aki ta forma opstákulo pa e turtugánan di laman ku ta pone webu riba e isla i sigur pa e beibinan ku no por haña nan kaminda pa laman.

Curaçao Clean Up ta enfatisá e importansia di traha huntu i p’esei den e 2 dianan boluntarionan di Sea Turtle Conservation Curacao, Uniek Curaçao i e  representantenan di Resembid a traha duru pa un meta. Ademas  tripulante di Mermaid en Miss Ann Boattrips a duna nan koperashon kompleto pa hasi e akshon di limpiesa aki un éksito .

Curaçao Clean Up ta yama DANKI na tur ku a registrá kaba pa partisipá na di dia nashonal di limpiesa, World Clean Up Day 2023. Pa mas informashon por subi www.worldcleanupdaycuracao.org òf mail na  [email protected]