3 diferente partido ta enbolbí den kaso di aksesibildat na playa di Parasasa.

Nieuwe Haven,– Durante tratamentu di un wisio sumario kaminda Pais Kòrsou i Fundashon Rif ke pa habri e playa 24/7, gerente di e edifisio di Marriott Hotel ta pidi pa yega na un akuerdo di maneho riba e playa.

E wisio sumario a keda tratá riba 29 di ougùstùs 2023 i a finalisá ku e huesnan di apelashon mester bishitá e playa riba forma personal pa asina analisá e situashon mas serka. Tres partido ta envolví den e wisio sumario kaminda tur partido tin nan propio eksigensianan. Piscamar Beach Resort N.V.ta pidi korte pa buta preshon riba gobièrnu pa asina Piscamar por sera un akuerdo di maneho riba e playa na Parasasa. Tambe Piscamar ta pidi korte pa laga Piscamar i gobièrnu traha huntu riba un porta ku por wòrdu habrí tur mainta i será tur anochi. Mas aleu, Piscamar a pidi korte pa eliminá e Ministeriele Beschikking ku a drenta na vigor algun dia promé ku nan a risibí derechi di èrfpagt. I si ta posibel, Piscamar a pidi pa korte anulá e Ministeriele Beschikking den su totalida.

Fundashon Rif a pidi pa korte pa tur tereno pegá ku Marriott Hotel tin akseso liber. Tambe Fundashon Rif a indiká na korte pa prohibí Piscamar pa sera e playa ku hèki i/òf muraya. Akaso Piscamar no kita e hèkinan, Fundashon Rif a pidi korte pa duna e gerensia di edifisio di Marriott Hotel pa paga un multa.

Por último pais Kòrsou(gobièrnu) a pidi korte pa honra e Beschikking Ministerial kual a drenta na vigor riba 20 di sèptèmber 2016. E lei ta dikta ku esun ku tin derechi riba e èrfpacht tin e obligashon pa tene e playa habrí pa públiko.