Fundashon Sentro di Bario Otrobanda.

WILLEMSTAD – Korte a disidí riba petishon di Fundashon Kas Popular (FKP) ku Fundashon Sentro di Bario Otrobanda (SBO) mester evakuá e edifisio na Sint Martinsteeg 1, ku e fundashon ta usa komo sentro di bario. Esaki pa motibu di un debe grandi di kasi 800 mil florin. Korte a tene kuenta sí ku e tempu pa kobra un gran parti dje debe ya a kaduká (verjaring), pero a husga ku e fundashon mester paga e debe di hür di aña 2018 te ku e aña akí sí. Si e fundashon no kumpli i evakuá e edifisio riba su mes, lo laga polis saka nan. Nan tin 6 siman di tempu kontando for di momentu ku nan risibí e sentensia di ayera.

A funda Fundashon Sentro di Bario Otrobanda na 1992. E fundashon tin komo meta pa stimulá e desaroyo general di poblashon di Kòrsou, spesífikamente den bario Otrobanda i serkania. Manera tur hende sa FKP ta un fundashon estatal ku ta enkargá ku maneho di kasnan sosial na Kòrsou. Dia 1 di sèptèmber 1991, ámbos partido a firma un kontrakt di hür pa FKP laga SBO hür e edifisio situá na Sint Martinsteeg 1. SBO a usa esaki komo sentro di bario. E kontrakt di hür tabata inisialmente pa un durashon di 5 aña, kuminsando dia 1 di sèptèmber 1992 te ku 1 di sèptèmber 1997. A renobá esaki outomátikamente ku 2 aña mas kada biaha. Prèis di hür pa luna ku mester a paga dilantá, tabata 2800 florin. Pero SBO no a kumpli ku su obligashon di paga hür, loke a kousa un retraso grandi.

FKP a manda notifikashon vários biaha pa SBO i a nòtifiká nan tokante e retraso den hür. SBO no a reakshoná mes. SBO a kontinuá okupá e edifisio di hür te ora di tratamentu verbal dje kaso sivil akí. FKP a entregá un demanda na Korte, buskando pa kibra e kontrakt di hür, pa laga evakuá e edifisio (si ta nesesario ku yudansa di outoridat), pa kobra e retraso den pago di hür i tambe e plaka di hür ku mester paga te na momentu ku nan evakuá e edifisio. Ta trata di un suma total di 772.700 florin.

FKP ta basa su demanda riba e echo ku SBO a faya den kumpli ku nan obligashon di paga hür, kousando asina un retraso grandi den hür te ku luna di febrüari 2023. SBO a argumentá ku e demanda di FKP a kaduká. Nan a argumentá tambe ku nan a trata repetidamente di yega na un akuerdo amistoso ku FKP, ya ku nan ta un organisashon ‘non-profit’, ku kontrali na tur otro fundashon, no ta risibí supsidio pa hür. Sinembargo, esaki no a duna resultado. SBO a tuma kontakto tambe Ministerio di Desaroyo Sosial, Labor i Bienestar (SOAW) ku tabata dispuesto pa paga e hür pa nan te ora gobièrnu ta dispuesto pa ofresé nan un edifisio di gobièrnu alternativo. Te ku e sentensia ta esei nan tabata warda riba dje. Segun SBO, e desmantelashon dje fundashon lo kousa un situashon di emergensia den bario Otrobanda i serkania.

Korte a evaluá e argumentunan di SBO ku e periodo ku por a kobra e hür bieu te ku febrüari 2018 a kaduká kaba i a konkluí ku esaki ta bálido. Esaki ta nifiká ku FKP no por kobra e parti di retraso den hür ta ku aña 2018. Despues Korte a trata e retraso den hür for di febrüari 2018 te ku febrüari 2023. SBO a argumentá ku nan no a paga hür durante e período akí, ya ku nan ta un organisashon ‘non-profit’ i no ta risibí supsidio pa hür. Korte a konkluí ku FKP tin derecho pa demandá pago di e retraso den hür, ya ku FKP ta un fundashon di karakter sosial ku ta dependé tambe di entrada di hür pa logra nan metanan. P’esei Korte no ta mira niun base pa kanselá e debe di hür atrasá manera SBO a pidi.

Finalmente Korte a kibra e kontrakt di hür entre SBO i FKP inmediatamente ayera. Korte a ordená SBO pa sali for di e edifisio na Sint Martinsteeg 1 denter di un periodo di 6 luna despues di risibí notifikashon di e sentensia. SBO mester entregá e edifisio den bon kondishon na FKP. Tambe Korte a kondená SBO na paga e retraso den pago di hür for di febrüari 2018 te ku febrüari 2023, i tambe e suma ku mester sigui paga na hür den futuro serkano, te ora ku SBO evakuá e edifisio.

Korte ta duna FKP derecho pa yama na outoridat pa asistensia si SBO no kumpli ku e órden di evakuashon. Pero Korte a rechasá e petishon di FKP pa kobra gastunan legal hasí pafó di Korte pa por kobra e debe atrasá, pasó FKP no a demostrá ku nan a hasi e gastunan akí den un manera legal i rasonabel. Korte a kondená SBO pa paga gastunan legal di e proseso akí sí ku FKP a hasi te na e fecha di sentensia, esta ayera, ku Korte a kalkulá na 7500 florin gastunan di grefi i 331,45 florin pa gastunan di notifikashon pa presentá den sala p’e proseso.