Fabian Martina ta presentá ‘Kerensianan di Antes’ na Sentro di Bario Otrobanda. 

Otrobanda, — Fabian Martina a presentá ‘Kerensianan di Ántes’ na Sentro di Bario Otrobanda.

Presidente di Sentro di Bario Otrobanda, Jonathan Plantijn,  a menshoná ku den kuadro di Siman di Kultura ta importante pa konsientisá kada habitante den e parti di historia di ántes i historia di awor.  Sr Plantijn ta menshoná ku asina ta mara e kabuya bieu na e kabuya nobo. Sr Plantijn a menshoná ku ta importante pa konsientisá kada habitante tokante di informashonnan di ántes, ya komo hopi informashon di ántes ta bai pèrdí.

Den kuadro di Siman di Kultura a pone 5 charla  pa asina konsientisá i informá kada habitante. Djaluna tabatin e charla di Dicho i proverbionan, djamars tabatin un charla di kerensia ku a wòrdu presentá dor di Fabian Martina, i djarason lo tin charla di yerba i su remedinan.  Djaweps lo tin charla di entiero di ántes kompará ku entiero di awor, i djabièrnè ta klousurá ku boutismo di pòpchi.

Sr Plantijn a menshoná ku lo hasi henter un fiesta pa e pòpchi na estilo di ántes kaminda, e mama, e tata, e padrino/a tur ta bai tei presente. Habitantenan ta keda invitá pa asina por eksperiensha e kerensia di ántes pa ku boutismo di e pòpchi. E dia aki ta sumamente importante paso esaki lo wòrdu dokumentá, i lo bai den archivo nashonal di Kòrsou.

Djasabra Sentro di Bario Otrobanda lo tin un dia den feria yamá ‘Den Dushi’, na kual for di mainta 10or lo tin diferente aktividat entre otro wega di dominó, kumindanan kultural i anochi lo tin e parti musikal.