Willemstad, — Den kuadro di koperashon pa loke ta e parti di formashon hudisial/polisial funshonarionan di Koninklijke Marechausse (KMar) i Opleidingsinstituut Rechtshandhaving & Veiligheidzorg (ORV) a reuní.

E reunion a tuma lugá djamars 20 di yüni na ORV. Direktor di ORV sra. Falbru i su hefenan a elaborá riba koperashon ku tin kaba entre e dos entidatnan i mas koperashon den futuro. A deliberá riba entre otro interkambio di konosementu i eksperensia, tantu entre dosentenan, ekspertonan/funshonarionan di edukashon i di e parti eksamen. Tambe a interkambiá riba mas formashon i material, edukashon spesífiko pa trayektonan di kontròl di frontera i plan di akshon pa reforsá fronteranan.

A papia tambe di mas formashon i desaroyo pa funshonarionan di gobièrnu di Reino. E funshonarionan a risibí un rekorido pa sera konosí ku persona, departamentu i instalashon di ORV despues di e reunion. Den lunanan benidero funshonarionan di ORV lo hasi un bishita di trabou na Hulanda i lo reuni ku e funshonarionanan menshoná na Apeldoorn. Di parti di ORV tabata den e reunion sra. Falbru, sra. Gonet, srs Mercelina  i Troeman. Sra. Angeline van Gils, sra. Aliza Vissink i majoor Jan Ploegstra tabata e representantenan di KMar.