Gabinete Pisas II no ta di akuerdo pa instalá un komishon temporal pa monitoriá e Landspakket.

Willemstad,– Den un karta dirigí pa presidente di parlamento, Promé Minister “Pik” Pisas, ta splika ku e tareanan di e komishon temporal pa kontrolá ehekushon di Landspakket por kontradesí ku e tareanan di gobièrnu.

Den e último 6 luna parlamento di Kòrsou tabata tin nan promé stazjèr for di Hulanda. E stazjèr ta studiando “bestuurskunde” na Haagse Hogeschool kaminda parlamentario Gwendell Mercelina Jr a enkargá su mes pa dirigí e trabou nan di e stazjèr. Pa finalisá e periodo di stazje e studiante, Julian Brouwers, a entregá un rapòrt ku rekomendashon nan tokante kon parlamento por kontrolá ehekushon di Landspakket riba un forma mas efektivo.

Paralèl na e rapòrt di studiante Brouwers, parlamentario Mercelina a proponé na parlamento pa instalá un komishon temporal ku ta keda enkargá pa mantené supervishon riba ehekushon i implementashon di Landspakket.

Den e karta di Mercelina e parlamentario ta indiká ku e komishon temporal lo tin e meta pa evaluá i monitoriá implementashon di e Landspakket mas di aserka. E komishon lo ta enbolbí mas aktivo den e proseso di negosiashon i tumamentu di desishon enkuanto e Landspakket. E komishon lo duna parlamento i pueblo di Kòrsou mihó bista riba e negosiashon i implementashon. I por último e komishon lo fungi komo un plataforma pa komuniká i representá e prekupashon nan di pueblo relashoná ku e Landspakket.

Mirando e metanan stipulá den e karta di Mercelina, Promé Minister Pisas ta indiká ku e metanan di e komishon temporal aki lo krea konflikto ku e tareanan di gobièrnu. Segun e karta di Minister Pisas, no ta e intenshon ku parlamento ta bai ehekutá tareanan di gobièrnu relashoná ku e Landspakket. Segun e karta di Pisas, tantu partisipashon mas aktivo den negosashon/ desishon di Landspakket komo buta prioridat na e medidanan di reforma no ta posibel. Mas aleu e karta ta indiká ku parlamento ta wòrdu tené na altura tokante e ehekushon di e Landspakket den su debido tempu via dokumentashon nan ofisial.

Tambe e karta ta splika ku miembronan di parlamento semper lo tin e oportunidat pa tene debatenan tokante e Landspakket kaminda e ministernan konserní lo ta presente.

Un dje puntonan pa instalá un komishon temporal pa Landspakket ta pa reforsá supervishon di ehekushon di Landspakket. E supervishon adishonal lo sòru ku desishon nan tumá dor di e gobiernu lo wòrdu hasí riba un forma mas transparente i demokrátiko, segun e karta di parlamentario Mercelina.