WILLEMSTAD – Aktualmente Minister di Desaroyo Ekonómiko (MEO) den koperashon estrecho ku ‘stakeholders’ (otro ministerionan, sektor privá ètsetera) ta ehekutando e inisiativanan di maneho: e proyekto “Prijs Publicatie Applicatie” (PPA); “Makutu Básiko Smart Card”; i e proyekto piloto di “Agrikultura”.

Esei Promé Minister enkargá ku Asuntunan General Gilmar “Pik” Pisas a kontestá Parlamentario Sheldry Osepa riba e pregunta, kiko ta e plan di gobièrnu pa dil ku e krísis di oumento di preis ku ta biniendo riba Kòrsou. Pisas a mustra riba e “Makutu Básiko Smart Card” pa dil ku ku e famianan mas suak.

PPA

Pisas a splika e proyekto PPA. Segun e premier, MEO a krea un aplikashon (ku aktualmente ta den fase di tèst) kaminda ku públiko general por hasi komparashon di preis di diferente komestibel i otro produktonan di promé nesesidat den supermarket i minimarket. “MEO ta hasi esaki pa alsa e nivel di konkurensia bou di komersiantenan i konsientisashon di e konsumidó pa su kompra. Mas konkurensia por nifiká un posibel redukshon di e preisnan riba merkado lokal.”

Makutu Básiko

E Makutu Básiko Smart Card lo sirbi komo un karchi pa duna deskuento riba komestibel i otro produktonna di promé nesesidat na personanan di ménos rekurso. “E deskuento ariba menshoná lo pone ku e grupo di enfoke, esnan di ménos di rekurso, lo por tin akseso na komestibelnan na un preis mas kompetitivo. MEO ta den kòmbersashon avansá ku sektor privá riba e inisiativa di maneho akí i e sektor ta di opinion ku e inisiativa en kuestion ta brinda sierto posibilidatnan.”

Agrikultura

MEO den koperashon estrecho ku Ministerio di Salubridat Públiko, Medio Ambiente i Naturalesa (GMN) ta traha riba un proyekto di agrikultura, ku tin komo meta pa mehorá e kondishonnan pa agrikultura na Kòrsou dor di entre otro: redusí gastu di produkshon; kultivá den zona franka; tereno pa agrikultura; i oportunidat pa trabou.

Redusí gastu

“MEO den kolaborashon estrecho ku Aqualectra aktualmente ta trahando riba proyektonan pa stipulá preis di awa faborabel pa por usa pa agrikultura. Un di e proyektonna akí ta e produkshon di e asina yamá ‘grijswater’, pa medio di mashin di ‘reverse osmosis’ ku nan lo pone na sitionan stratégiko banda di e klùsternan agrario mas grandi.”

Kultivá

E premier ta splika ku MEO i CURINDE yega na un akuerdo tentativo pa yega na preisnan atraktivo pa por hasi uso di instalashon i terenonan di CURINDE pa praktiká kultivo moderno. Esaki ta konta tantu pa e zona na aeropuerto, komo esun na Nieuwe Haven.

Tereno

Segun Pisas, MEO ta den proseso pa sondia e posibilidat pa yega na posibel kolaborashon ku Ministerio di Tráfiko, Transporte i Planifikashon Urbano pa fasilitá entrega di tereno pa agrikultura. Esaki ku e meta pa stimulá i alsa produkshon lokal. Tin hopi tereno ku ta destiná pa agrikultura, pero ku na e momentunan akí no ta den uso. E intenshon ta pa purba hinka e terenonan menshoná mas lihé posibel den operashon.

Trabou

“Un di e opstákulonan mas grandi riba tereno di agrikultura ta pa atkerí personal kapasitá pa laborá den e sektor. Den kuadro di esaki, MEO a aserka Ministerio di Desaroyo Sosial, Labor i Bienestar pa ehekutá un ehersisio pa yega na kandidatonan ku lo por ehersé e labornan ariba menshoná.”

Segun Pisas, ku e diferente proyektonan menshoná, ta fèrwagt pa por ta ménos dependiente di importashon. “E diferente inisiativanan menshoná lo tin un efektivo positivo riba Kòrsou su Balansa di Pago. Tambe MEO ta kanando un trayekto huntu ku Ministerio di Salubridat Públiko, Medio Ambiente i Naturalesa, pa por kuminsá importá karni ku wesu bèk for di paisnan manera Argentina, Brazil, Uruguay i Paraguay.”

Osepa tabata ke sa tambe di Pisas kon gobièrnu tin pensá di dil ku famianan mas suak relashoná ku e krísis na kaminda, i ela referí na entre otro su kontesta tokante e Makutu Básiko Smart Card. Entre otro lo garantisá stabilidat di preis i akseso na produktonan di promé nesesidat pa eksonerá esnan mas debil den komunidat for di oumento di preis.