DEN HAAG—Gabinete ta bai purba kobra daño perhuisio di e kontroversial deal di tapaboka di eks-politiko Sywert van Lienden i su sosionan.

Minister Helder a priminti Tweede Kamer esaki den un debate riba e raport di Deloitte pa investigá e deal. Estado ta sigui konseho di e abogado di gobièrnu, ku ta bisa pa warda tur e investigashonnan den e kaso. Gobièrnu a kumpra 100 mion euro na tapaboka na komienso di Corona di Van Lienden i sosionan. Nan a hasi ganashinan mionario mientras Van Lienden a bisa ku a duna gobiernu yudansa gratis. No ta konosí kuantu estado kier kobra bek. van Lienden mes tabata den tribuna públiko pa sigui e debate. Partidonan di oposishon tabatin kritika fuerte riba gabinete. Partidonan di koalishon a papia di un deal mahos ku a laga un smak amargo atras. Deloitte ta hasiendo tres investigashon riba instrukshon di ministerio di Salubridat. Solamente e prome ta kla, ku ta trata e deal ku Van Lienden spesifikamente. Nan ta papia di un investigashon di hechos imparsial, nan no kier mustra esnan kulpabel. E dos otro partinan di e investigashon ta trata e maneho di kompra di materialnan di protekshon kontra corona den sentido amplio. Mester bira kla si Van Lienden a haña trato preferensial kompará ku otro proveedornan di material mediko. Tambe ta bini un enkuesta parlamentario di Tweede Kamer riba e maneho di corona di gabinete. Na sèptember Ministerio Públiko a sepone e investigashon penal riba e fundashonnan Alliantie Hulptroepen. E investigashon riba e tres eks-komisarionan, Sywert Van Lienden, Bernd Damme i Camille van Gestel ta sigui.