ALKMAAR—Un kompania den Heerhugowaard mester paga estado 43 mion euro bèk pa entrega di tapabokanan defisiente durante krisis di corona.

Asina korte na Alkmaar a determiná. E kompania O2 Health ta spesialisá den aparatonan pa drecha kalidat di aire. E kompania a sera un akuerdo ku ministerio di Salubridat den mart 2020 pa entrega di 18 mion tapaboka (FFP2) pa personal den kuido. Partidonan a palabra un suma di 56 mion euro, kasi 3 euro pa kada tapaboka. Mesun luna gobièrnu a duna un avanse di 45 mion euro. e kompania no a logra entrega e tapabokanan na tempu i e kantidat ku si a yega no tabata kumpli ku e kondishonnan di kalidat, segun investigashon. tin biaha e filternan no tabata bon, of e forma. Na mei 2021 gobièrnu a disidí di kibra e akuerdo. E kompania a keda ordená pa paga 43 mion euro bek di e avanse di 45 mion. Korte na Alkmaar a bai di akuerdo. Pa e kompania esaki ta nifiká bankarota. E kompania lo apela e desishon. Segun e ministerio e kompania ta e úniko ku tin un kaso kontra dje pa tapabokanan defisiente. Medio 2021 Kontrolaria General a konkluí den un rapòrt krítiko ku e ministerio di Salubridat a gasta 5,1 miar euro di belasting na material di corona manera tapaboka di forma iresponsabel. Di 40% di e material no por bisa kiko a pasa. A konstatá ku e maneho finansiero tabata bou di nivel, segun Kontrolaria General. Ta trata di difesiensa grave. E ministerio a bisa den un reakshon ku den e krisis di corona mester a tuma medidanan sin presedente. E akuerdo di mas remarkabel tabata esun di 100 mion euro ku prominente di CDA Sywert van Lienden ku su sosionan a gana 30 mion. E plaka nunka a bini bek i no a start un prosedura hurídiko, ounke e minister a primintí di wak si por kobra e daño.