Paga: algu ku te ainda niun hende a para ketu ariba. Knops a konfirmá den prensa ku kada isla mes mester paga pa ehekutá COHO. Sin sèn pa ehekushon no por garantisá implementashon di COHO. Meskos ku e GVP den Lei di Polis, no tabatin sèn pa ehekushon.

Rio Canario– E entidat di GVP deskribí den e Lei di Konsenso Polis ta komparabel ku lokual por sosodé ku COHO. Ámbos ta trata di diseño di lei unda tin konsenso riba kontenido i forma, pero no tin konsenso riba ehekushon, esta implementashon. COHO, meskos ku e Lei di Polis ta un diseño riba papel. En realidat, e poder tras di e lei ta bira mas importante ku su ehekushon i kousa mas daño.

Pa lokual ta trata e Lei di polis, e aspekto polisial mas importante den e konstelashon, ta e asina yama Gemeenschappelijke Voorziening (G.V.). Pa medio di esaki medionan i personal, mester a regla pa kombatí kriminalidat mas pisá. GVP mester bira un departamentu òf organisashon ku ta pone hende, material i medionan finansiero disponibel na e tres diferente kuerponan. Kòrsou, St. Maarten i BES den e kuadro ei. E polisnan no ta den servisio di e organisashon di e GVP, pero ta keda den servisio di e diferente paisnan. E organisashon mester a bira esun di mas poderoso den e konstelashon nobo. E direktor di e organisashon ta esun metí den disidí ken ta traha na unda, den investigashon grandi. Si ta nesesario, e ta konsulta ku e “korpschef”. Si nan tin un konflikto, nan por aserka P.G. Si e problema keda, e ora ei  “ onze Ministers” (kuerpo di ministernan di hustisia den reino) ta disidí. Den e kuadro ei nos bira schaakmaat kual ta unu dje motibunan dikon GVP no a lanta for di suela. Pasobra den e órgano ei (Onze Ministers) Hulanda tin dos Minister via BES, i Kòrsou tin unu so. Tabata e intenshon pa “Onze Ministers” nombra, promové, suspendé i retirá e direktor di G.V., ku tin di reportá na nan. Ademas di esei, tantu den kuadro di BES, komo den kuadro di e “aanwijzing” e Ministernan Hulandes ( i di Reino) por instruí nos P.G, kiko tin di sosodé. Hulanda a laga krea e GVP pa nan tin e delaster palabra semper. E direktor di e G.V. mester a bai bira esun responsabel pa maneho stratégiko di personal polisial den e kuadro ei. E nombramentu di e direktor tabata un asuntu di e tres paisnan, Kòrsou, St.Maarten i BES. Manera nos a mira kaba, BES, ku ta hopi mas chikitu ku nos, tin dos Minister (Hulandes), i nos tin unu den e órgano di “onze Ministers”. 

P.G ni e “korpschefnan”, no tabatin bos determinante den esaki. Tabata e intenshon pa laga e desishon final ta den man di un órgano kaminda Hulanda tin dos be mas tantu voto ku Kòrsou.  Tur hende ku pasport Hulandes, por a solisitá, despues ku publiká e vakatura, maske e lei mes no ta konta pa e parti Europeo di Reino. E G.V mes, no tin identidat hurídiko, p’esei e personal ku e ta manda riba dje lo no ta den su servisio, pero den esun di e paisnan. Su gastunan, lo wòrdu kubri dor di Kòrsou, St.Maarten i Hulanda. Rijksministerraad, ku de fakto, ta nada mas ku e mes un gobièrnu Hulandes, ta stipulá su begroting. Den kaso di COHO ta meskos. Raymond Knops a bisa bon kla ku e gastunan di ehekushon COHO mester wòrdu kargá pa kada pais.

Hulanda tabatin e intenshon pa laga e direktor di e G.V sòru pa ehekutá e plan di maneho i e presupuesto di likides den Kuerpo di Polis. Esaki lo a krea un figura todopoderoso den organisashon polisial ku ta bai disidí riba e saku di plaka i e direkshon di personal den kuadro di investigashonnan polisial. Mas poderoso ku tur e korpschefnan pareu, pa loke ta trata reshèrshe, detenshon di sospechosonan konsiderá peligroso, métodonan di investigashon táktiko, tékniko, finansiero, analítiko, kolekshon di informashon, investigashon digital, opservashon etc. Den hinter e kuadro amplio aki, e GV(P)por disidí riba personal,material i medionan finansiero ku tin di wòrdu pon’é disponibel na e diferente kuerponan. Ningun korpschef lo no por par’é. E lo tin tur e sèn i e material nesesario pa e investigashonnan ariba menshoná.

Konklushon mester ta, ku si e GVP a bira realidat nos lo no tabatin kontròl demokrátiko riba e podernan di investigashon i alokashon di medionan finansiero. E mesun intenshon ta nota awor den COHO. Lokual a bira remarkabel ta e hecho kon, despues di 4 aña Hulanda kombensé konseheronan di Kòrsou pa durante evaluashon riba e Lei di Polis, pa duna RST e funshon di GVP. E ponensha a keda menshoná tambe den e rapòrt di evaluashon. GVP nunka mas a keda implementá. Esei ta unu dje pruebanan kon Hulanda i Kòrsou ta diseñá un Lei di Konsenso riba papel, sin tin interes pa realmente ehekutá. Lokual si a sosodé ta ku Hulanda fortifiká RST ku miónes di euro na finansiamentu i laga e Kuerpo di Polis sin rekursonan finansiero. RST entretantu a bira un poderio sin kòntròl polítiko miéntras polisnan yu di Kòrsou ta trahando sin rekursonan adekuá. Si no tene debido koutela ku COHO e resultadonan lo ta igual den kaso di GV(P).