De Caster ta bisa ku e 9 sèn di bahada riba gasoil no ta hasi masha diferensha sigur mirando ku ta 7 aña preis di bus a keda mesun kos.

Willemstad,– E representante di shofùrnan di bus, señor Giovanni de Caster ta bisa ku ta insolito ku gobièrnu ta midi ku dos midi, paso si kualkier komersiante bende produkto inferior ta sera su lugá mesora i e no por habri esaki miéntras ku e no bini ku produkto di bon kalidat.

E ta bisa kontrali na esaki, Curoil si por, paso nan ta bini ku produkto inferior i ta sigui bende esaki sin ku nada ta pasa.

E ta bisa ku a tarda hopi, pero danki na e sistema di hasi polítika nobo ku e minister di finansa a bini kuné ku a pone preshon riba e minister di ekonomia biniendo den publisidat i pone ku minister a hañ’é ta keda skerpi pa finalmente yega na e resultado ku tin awor aki.

De Caster ta bisa ku si no ta pa esei nunka lo a bini e resultado ku tin riba mesa. Danki na e sistema di hasi polítika nobo di minister di finansa.

E ta sigui splika ku awor e bala ta den skochi di e minister di finansa, paso a kuestioná e minister di ekonomia riba kalidat, i awor ta e preis ta loke ta ser kuestioná kaminda de Caster ta bisa mester haña un kos pagabel pa Ma Yeye tambe por transportá su mes.

“Diesel e baha ku 9 sèn, pero shete aña largu e tarifa di bus ta mesun kos. Nunka nos no ta haña “recovery”, siendo Curoil si lo a haña esaki”, pues de Caster.

“E kalidat ta malu, e ta daña nos vehíkulonan i ken ta drecha esakinan”, asina de Caster ta puntra.

E ta bisa ku e 9 sèn ku nan a baha riba gasoil,  kasi no ta nada, paso tur e dañonan kousá na nan vehíkulo i tur e añanan ku nan a paga karu, ya pone ku e 9 sèn di rebaho ta kasi nada si bo mira tambe ku ta masha poko e meter ta skùif ora bo yena gasoil.