Aprel 2024: si Global risibi lisensia OFAC, huma lo kuminsá sali for di pipanan na Isla.

ISLA—E kompania Global Oil Management a aserka OFAC, Office of Foreign Asset Control pa un lisensia. Global tin un kontrakt firma ku Refineria di Kòrsou i Curaçao Refinery Utilities pa produsí asfalt. Pa por produsí asfalt, e kompania mester di krudo i chènsnan ta grandi ku esaki lo sosodé via di Venezuela.

Kontrali na lokual a sosodé na Bullenbaai bou di maneho di RdK i CRU, Global si a aserka OFAC na Ougustus último pa un lisensia OFAC. E petishon a keda hasí ofisialmente pa Global Oil Management LCC, registrá na Boca Raton Estádos Unídos. Na momento, OFAC aprobá e petishon, krudo venezolano, despues di 5 aña ta kuminsá drenta Bahia Santa Ana. Mediante intervenshon di nan sukursal establesé na Kòrsou (CORT) a entrega e petishon ofisial na OFAC (Ofisina di Kontrolaria Aktivonan Internashonal) pa un lisensia.  E petishon ta enserá pa CORT, por risibi pèrmit di OFAC di por kuminsá importá krudo i òf produktonan petrolero for di Venezuela. Na e momentonan aki, Global tin un kontrakt di 5 aña firma ku Refineria di Kòrsou (RdK) i Curaçao Refinery Utilities (CRU). E kontrakt ta enserá uzo di fasilidat i servisionan di e dos kompanianan kontra di un pago di por lo ménos di 2 mion florin mensual na RdK i CRU, repartí. Manera menshoná e petishon di Global ta pa kuminsá importá krudo for di Venezuela. E konsiderashon pa e pèrmit ta pa mehorá e kalidat di asfalt ku tin riba kareteranan na Estádos Unídos. Segun Global e krudo brutu di Venezuela ta mihó pa traha asfalt debí na su konstelashon. Estádos Unídos tin un skarsedat di asfalt i alabes tin mal kalidat di asfalt prinsipalmente den estadonan sùit di e pais.

Global Oil, ya a mustra nan seriedat dor di a depositá sumanan mionario riba nan kuenta bankario lokal pa inisiá e trabounan pa upgrading di e fasilidatnan. Global den nan kontrakt a deliniá eksaktamente kua sektor i kantidat di tanki nan tin mester i spesifiká tur fasilidat produktivo riba tereno di Isla. Aparte di a firma ku Refineria di Kòrsou, Global a firma kontrakt di servisio ku CRU tambe, pero e suma ku tin di paga mensual no ta inkluso e servisionan di CRU. Pa esei a laga traha un tabel apart di pago, dependiendo di e servisionan ku Global uza. Ta trata di servisionan apart di por ehèmpel, brantwer, operashon di jetty i terminal i pa servisionan di laboratorio. Ta trata di sumanan pa kada servisio ku ta kore di 240 mil dòler mensual te ku 50 mil dòler mensual.  E inisio di e fasenan preliminar i firmamentu di un kontrakt entre CUR i Global, ta duna mas garantia pa CRU por sigui nan proseso pa firmamentu di kontraktnan laboral permanente. CRU ya a anunsiá ku entrante 1 di sèptèmber 2023, aktual personal di CRU ta risibi un kontrakt definitivo

Global a súplika pa risibi mesun pèrmit di OFAC komparabel na esun ku Chevron a risibi unda ta outorisá pa kumpra krudo na Venezuela. Chevron for di Yanüari 2023 a risibi outorisashon pa saka krudo for di Venezuela hiba Estádos Unídos. E kontrakt entre Global Oil Managment i Refineria di Kòrsou, ta obligá Global Oil di paga mensual un suma di mei mion dòler pa hür fasilidatnan riba tereno di Isla. Ta trata di alrededor di 900 mil florin pa luna. E kontraktnan ta  añadí na un mehorashon di kondishonnan sekundario. Esaki ta lokual un presentashon di CRU na e proyekto  “Start up of Asphalt train” ta informá. Segun e presentashon, a inisiá ehekushon di kontrakt riba 10 di yüli. CRU tambe tin un kontrakt ku Global. Ta kuminsá ku rekonstrukshon kual ta tuma 9 luna na enkargo.  E fase di rekonstrukshon ta andando pa 4 luna i enserá, finalisá proseso di inspekshon di tur e fasilidatnan ku Global ta bai uza, kumpra material nesesario,ehekutá tur reparashon na e fasilidatnan utilisá i instalá ekipo nobo pa e proveé e struktura pa vaporashon (Propano i Butano).