ISLA—E dos kompanianan, ku te ainda ta mustrando di ta bai ópera riba tereno di Refineria Isla, Global Oil i Oryx Petroleum, konosé otro riba merkado petrolero. Harry Seargant III, direktor di Global Oil Management Group tin kontakto ku e organisashon di Qatar Investment Authority, kual grupo tin Oryx Petroleum den nan bolsa di invershon.

Oryx, kual kompania Refineria di Kòrsou a konfirmá di firma un MOU ta un kompania ligá ku e organisashon potente di Qatar Investment Authority, kual organisashon ta manehá e Fondo di Invershon Soberano di Qatar. Manera Vigilante a publiká, Oryx tin interes den Isla i Bullenbaai. Esei ta lokual fuentenan verídiko a informá redakshon di Vigilante.

Ta trata di un kompania ku tin sosten di e fondo di invershon soberano di Qatar. Esaki por ta otro bon notisia pa Bullenbaai i Curaçao Refinery Utilities. E terminal di tanki na Bullenbaai ta pasando den mal tempu, despues di konfliktonan sivil rondó di derechinan entre e kompanianan ligá ku Caribbean Petroleum Refinery. Bullenbaai for di Febrüari 2023 no ta risibiendo pago. Entretantu CRU a kibra e kontrakt ku CPR, den lokual a kondusí na mas ku 7 kaso sivil den korte pa claim propiedat di 490 mil bari di fuel oil den tankinan na Bullenbaai.

Anke fuentenan ofisial no ta konfirmá, Global Oil Management tin kontakto ku Oryx. Chens ta grandi, ku ámbos mester sinta na mesa pa kordiná e fluho di krudo for di Venezuela pa rafinashon pero tambe pa produkshon di krudo. Entretantu, Global Oil a hasi nan petishon pa kuminsá importá krudo for di Venezuela. Na momento, OFAC aprobá e petishon, krudo venezolano, despues di 5 aña ta kuminsá drenta Bahia Santa Ana. Mediante intervenshon di nan sukursal establesé na Kòrsou (CORT) , Global a entrega e petishon ofisial na OFAC (Ofisina di Kontrolaria Aktivonan Internashonal) pa un lisensia.  E petishon ta enserá pa CORT, por risibi pèrmit di OFAC di por kuminsá importá krudo i òf produktonan petrolero for di Venezuela. Na e momentonan aki, Global tin un kontrakt di 5 aña firma ku Refineria di Kòrsou (RdK) i Curaçao Refinery Utilities (CRU). E kontrakt ta enserá uzo di fasilidat i servisionan di e dos kompanianan kontra di un pago di por lo ménos di 2 mion florin mensual na RdK i CRU, repartí. E konsiderashon pa e pèrmit ta pa mehorá e kalidat di asfalt ku tin riba kareteranan na Estádos Unídos. Segun Global e krudo brutu di Venezuela ta mihó pa traha asfalt debí na su konstelashon.

Aparte di eksportá asfalt pa Estádos Unídos, e sosio  di Refineria di Kòrsou, Global Oil Management Group di Boca Raton, Estádos Unídos, ta dispuesto na eksportá krudo di Kòrsou pa islanan karibense. Esaki ta lo lokual nan konseheronan petrolero Greta Lichtenbaum i David Ribner, a splika e Ofisina di Kontrolaria Aktivonan Internashonal OFAC). Ta e intenshon pa saka e asfalt òf di Kòrsou, eksportá dirèkt pa Estádos Unídos pero tambe tin opshon pa duna sosten na islanan Karibense den mantenshon di nan kareteranan.

Segun e kontrakt di Global, nan tin derechi riba maneho di fasilidatnan riba tereno na Refineria Isla. Oryx su MOU ta dirigí pa maneho di Refineria Isla lokual por nifiká, posibel negosashon entre Oryx i Global Oil Management di Boca Raton. Por ehèmpel, e kontrakt entre Global Oil Management i Refineria di Kòrsou, ta obligá Global Oil di paga mensual un suma di mei mion dòler pa hür fasilidatnan riba tereno di Isla. Ta trata di alrededor di 900 mil florin pa luna, pa uzo di fasilidat, ekskluí for di e pagonan pa uzo di servisionan na CRU, kual tambe ta pronostiká di ta alrededor di 500 mil florin adishonal. Global a firma kontrakt di servisio ku CRU tambe, pero e suma ku tin di paga mensual no ta inkluso e servisionan di CRU. Pa esei a laga traha un tabèl apart di pago, dependiendo di e servisionan ku Global uza. Ta trata di servisionan apart di por ehèmpel, brantwer, operashon di jetty i terminal i pa servisionan di laboratorio. Ta trata di sumanan pa kada servisio ku ta kore di 240 mil dòler mensual te ku 50 mil dòler mensual. 

Momento RdK a firma ku Oryx, mester konsiderá e kontrakt ku Global Oil Management. Global den nan kontrakt tin spesifikashon detayá riba kua fasilidat nan ta bai uza pa kual a duna Global derechi riba uzo pa e siguiente 5 añanan.