Ghanim Bin Saad

ISLA– Un eskoho nobo pa firma MOU riba maneho di Refineria Isla, atrobe ta keda kuestioná. E kompania Oryx Petroleum, for di 1 di aprel 2021 tin registrá komo direktor un miembro di famia Qatari rekonosé mundialmente pero kuestioná pa soborno.

Ministerio Públiko na  Brazil i FBI a investigá un transferensia di 22 mion dòler estado unidense, unda un posibel sosio nobo di Refineria di Kòrsou, su direktor por ta envolví. Ta trata di un transferensha bankario supuestamente konektá ku Kopa Mundial Qatar 2022. Esaki segun informe di Mediapart di Fransia.  Ministerio di hustisia di Brazil i fiskalnan di Merka a investigá deklarashonnan bankario di Federashon di Futbòl di Brazil su presidente, Ricardo Teixeira. Teixeira a habri un kuenta na Pasche Monaco – un instansia basá na Suiza kontrolá pa Credit Mutuel te na 2013. Nan a nota un pago di 22 mion dòler for di e grupo Qatarí Ghanim Bin Saad Al-Saad & Sons Group (CSSG) na e kuenta bankario na yanüari 2011, poko despues ku Qatar a risibí e torneo di 2022.

Mediapart a raportá ku CSSG, “liderá pa empresario Ghanim Bin Saad Al-Saad, ta den sospecho di korupshon.” Ta relashoná e pago na Teixeira na otorgashon i sosten pa Qatar por a risibi e sede di Mundial. E tabata un miembro di Komité Ehekutivo di FIFA ku a partisipá den e votashon na desèmber 2010 ku a otorgá Kopa Mundial di 2022 na Qatar. Segun registronan internashonal, Ghanim Bin Saad, for di Aprel 2021, ta registrá komo direktor di Oryx Petroleum. E kompania ku Refineria di Kòrsou a kaba di firma un MOU.