Net Gabinete Pisas II tabata den negosiashon ku Gobièrnu Hulandes tokante refinansiamentu di e fiansa (Corona-leningen) di kasi 1 bion florin.

WILLEMSTAD – Despues di un aña i mei, dia 7 di yüli último, Gabinete Rutte IV na Hulanda a kai pa motibu di desakuerdo den e gabinete tokante e maneho di asilo ku mester keda ehekutá. Gobièrnu di Kòrsou sinseramente ta lamentá kaida di e gabinete, kual a sosodé nèt na un momento krítiko pa loke ta trata e relashonnan ku tin den Reino.

Durante e periodo di gobernashon di Gabinet Rutte IV, Gabinete Pisas II huntu ku Sekretario di Estado di Asuntu Interno i Relashon den Reino, sra. drs. Alexandra van Huffelen, a traha duru riba un agènda komun pa implementashon di e reformanan manera stipulá den e Pakete Pais i tambe na realisashon di un Akuerdo Mutuo pa kolaborashon den ehekushon di e reformanan, kual ta remplasá e Lei di Reino COHO.

Gabinete Pisas alabes a hinka hopi esfuerso den e último aña pa yega na implementashon di vários programa di Hulanda, manera e “Nationaal Groeifonds”, e areglo pa Stimulashon di Produkshon di Energia Sostenibel i Transishon di Klima (SDE++), i e areglo di garantia pa ofresé krédito na negoshinan chikí i mediano (BMKB). Tur esaki ku e enfoke riba desaroyo di un ekonomia duradero i pa mehorashon di nos sistema edukashonal a traves di un programa di digitalisashon esensial. Ademas, a mira hopi avanse den negosashonnan ku Gobièrnu Hulandes tokante pone e fondonan nesesario disponibel pa invertí den infrastruktura físiko di nos pais. Tambe tin diferente otro programa, proyekto i reforma, manera proyektonan relashoná ku transishon di energia i mehorashon di e aparato gubernamental i servisio na públiko, ku aktualmente – den kuadro di e Pakete Pais – ta ser implementá ku sosten di Gobièrnu Hulandes.

Durante e último lunanan, Gabinete Pisas II tabata den negosiashon ku Gobièrnu Hulandes tokante refinansiamentu di e fiansa (Corona-leningen) di kasi 1 bion florin ku a duna Kòrsou durante e pandemia di COVID-19. E periodo di amortisashon ta terminá dia 10 di òktober próksimo i intenshon ta pa e fiansanan akí keda refinansiá pa Gobièrnu Hulandes bou di kondishonnan konseshonal. Den e mésun kuadro, ta tin negosiashonnan andando tokante e kréditonan nesesario pa un programa di invershon grandi di algun shen mion florin ku ta kai den un kuadro ekonómiko di vários aña pa Kòrsou. Meskos ta konta pa e problemátika di Ennia, kaminda Gabinete Pisas II a bin ta hiba diferente kombersashon ku Gobièrnu Hulandes pa yega na un solushon efektivo na benefisio di aseguradonan. Apesar di e karakter demishonario di e gabinete hulandes, Gabinete Pisas II lo keda traha diariamente ku Gabinete Rutte IV riba e asuntunan pendiente pa nan keda realisá segun e akuerdonan ku tin.

Gobièrnu di Kòrsou ta determiná tambe pa mantené un relashon fuerte i konstruktivo ku Gobièrnu Hulandes na benefisio di e interesnan mutuo i bon relashon ku tin entre e paisnan den Reino. Konsekuentemente, lo sigui traha mas efisiente posibel riba e asuntunan pendiente huntu ku Gobièrnu Hulandes pa konhuntamente yega na solushonnan na bienestar di Reino i nos siudadadonan. Gobièrnu ta gradisí e gobièrnu hulandes demishonario aktual pa nan sosten durante e último aña i mei i ta deseá nan hopi forsa durante e periodo di transishon pa e próksimo elekshon di Tweede Kamer i formashon di un gobièrnu nobo.