A opta pa pone vigilansha pa protehá e hefe di servisio veterinario.

Willemstad- Promé Minister sr. Gilmar Pisas i alabes Minister enkargá ku Medio Ambiente i Naturalesa, a haña informashon di Servisio di Inteligensia di Kòrsou ku probablemente malechornan a kima vehíkulo privá di e Hefe di Servisio Veterinario. Minister, Gobièrnu i komunidat kompletu ta kondená e aktonan repugnante i baho aki i ta hasi un yamada pa un i tur apstené nan mes di kualke tipo di akto kontra di lei.

E yamada ta bai tambe pa un i tur respetá propiedat di kada suidadano.

E echo ku e Hefe di Servisio Veterinario ta un ámtenar i pendiente di un investigashon di loke a sosodé ku e vehíkulo, Gobièrnu a tuma e desishon pa pone protekshon na disposishon di e Hefe.

Esaki ta konta tambe pa e Hefe Suplente ku a trese dilanti ku e tambe ta sintié insigur mirando e último akontesimentu aki.