WILLEMSTAD –Gobièrnu tin ku sòru pa proyektonan ta bon prepará i promé ku ta kuminsá, mester ta kla kuantu sèn i hendetin mester i kiko e eksigensianan ta di e produktonan ku mester kumpra. Tambe mester wak kiko e eksigensia legal ta.

Asina Kontraloria General Kòrsou (ARC) a kontestá Parlamento por eskrito, riba preguntanan ku tantu miembro Sheldry Osepa komo Gwendell Mercelina di frakshon di PNP a hasi, dia 27 di sèptèmber despues di un presentashon dje rapòrt di ARC tokante resultadonan di nan investigashon riba efektividat dje proyekto. E investigashon tabata dirigí riba e pregunta si a ehekutá e proyekto di supervishon di kámara, si a hasié efektivamente i den e presupuesto asigná p’esaki.

Manera Vigilante por a konkluí for di e resultadonan dje investigashon i tambe e presentashon dje Kontraloria General den sala di Parlamento, mester kontestá tur e preguntanan ei ku ‘nò’. E proyekto no tabata bon prepará. “Akumpra kámara i pa falta di finansa no a instalá nan. Teknologia ta sigui desaroyá i e kámara por bira opsoleto sin ku a usa nan ni un dia. Tambe tin kámara riba outo di polis ku nunka a usa. Por konsiderá tur esaki komo destrukshon di kapital.”Sheldry Osepa di PNP tabata ke sa si Kontraloria a investigá si tabatin “kick back” di e 21.6 mion florin ku a paga i kiko a bini bèk ku nos por a mira. “Kontraloria no a hasi un investigashon riba “kick back” den e investigashon di Kámara di Vigilansia. Si a kaso Kontraloria ta sospechá aktonan den kuadro di un investigashon kastigabel (Artíkulo 46 di e Ordenansa Nashonal Kontraloria General), Kontraloria mester señalá esaki inmediatamente na e outoridatnan konserní (esta Ministerio Públiko i Landsrecherche) i tambe na e Ministerio di Hustisia. Gwendell Mercelina di PNP a puntra si a tene kuenta ku outoridat di dato personal. ARC: “For di investigashon a sali na kla ku esaki no ta aplikabel, pasó aki ta trata di dato polisial.

E interes di protekshon di dato personal no a stroba e proyekto, pasó e informashon ku ta usa ta dato polisial.”Zita Jesus-Leito di PAR tabata ke sa pakiko a bai direktamente pa e kompania chines Inspur. ARC: “Esei tabata eskoho di Minister di Hustisia (redakshon Vigilante: Nelson Navarro di partido Pais e tempu ei). Minister di Hustisia por duna e motibu. Den e paragrafnan 3.2.1. i 3.2.3. di e rapòrt, Kontraloria a duna un splikashon kiko segun e no a bai korekto den e parti di preparashon. Manera Vigilante a splika ampliamente den pasado resien, ARC a splika den e rapòrt ku no a fiha un presupuesto total di antemano pa ehekushon di e proyekto i esei ta pone ku, te ainda, ta segun nesesidat presentá, ta reservá fondo riba presupuesto. “E proyekto no a keda realisá denter di e presupuesto fihá,ya ku no a komplet’é ainda i ya a eksedé e presupuesto fihá ku 1,8 mion florin.

Ademas, no tin fondo presupuestá pa kaba e proyekto. Ku otro palabra, no tin sufisiente fondo pa komplet’é. Fondo ta nesesario entre otro pa e trabounan di kobamentu pa por pone e kámaranan ku falta i tambe pa kumpra mas kámara. Fuera esei, debí na un maneho defisiente di depósito (entre otro, almasenamentu negligente), tin chèns ku entre tantu e kámaranan i demas ekiponan kumprá a bai atras na kalidat i/òf ku e stòk real ta ménos ku loke ta suponé. Otro riesgo ta ku e produktonan akí por bira antikuá, debí na desaroyo rápido di teknologia riba e tereno akí. Esei lo nifiká ku mester bolbe hasi gastu pa remplasá nan. Ademas, tin gastu mará na e (múltiple) kámaranan konektá kontinuamente riba e ret, personal pa ehekutá un vigilansia di 24 ora pa dia i 7 dia pa siman, mantenshon regular i remplaso na tempu di e kámaranan i ekipo korespondiente, i e gastunan ta oumentando.

”Juniël Carolina tabata ke sa si Kontraloria a hasi un investigashon ki spesifikashon (megapixel) e kámaranan tin. “Kontraloria no a investigá e parti tékniko di e kámaranan, pasó esaki no tabata parti di e meta di e investigashon. E investigashon ta mustra ku den e preparashon no tabatin un dokumento ku tabata preskribí e eksigensianan tékniko di e kámaranan.” Steven Croes di PAR a mustra riba e fabrikante dje kámaranan Dahua, ku supuestamente ta riba e lista di National Defense Authorization ACT (NDAA), ku instansiananmerikano ta prohibí di hasi negoshi kuné. El apuntra si Kontraloria a investigá si e fabrikante di e kámara ta riba e lista di NDAA. Pero segun ARC, den nan investigashon no a bin dilanti ku a kumpra kámara for di Dahua, pero ku a kumpra kámara serka Inspur. “Manera menshoná den e rapòrt, a sera dos kontrakt ku Inspur.”