WILLEMSTAD,- Gobièrnu di Kòrsou no por duna e garantia ku den futuro e lo aserká parlamento promé ku e firma kualke akuerdo ku otro paisnan den Reino. Den kaso ku ta trata di un  di informashon ku ta trese éksito di kualke proyekto na fabor di komunidat en general den peliger, gobièrnu lo keda kouteloso ku dunamentu di informashon promé ku firma un akuerdo.

Asina promé minister Gilmar ‘Pik’ Pisas ta trese dilanti den un karta pa parlamento. Pisas ta reakshoná riba preguntanan di parlamentario pa partido Nashonal, Sheldry Osepa ku a base di e komoshon ku a surgi riba firmamentu di e areglo mutuo a puntra si den futuro gobièrnu lo duna parlamento informashon promé ku e firma kualke akuerdo. Kontrali ku tabata e kaso na Aruba, Pisas no a bai Staten pa duna informashon riba e areglo mutuo promé ku a firma esaki dia 4 aprel último na Hulanda.

Pisas ta bisa ku na e momentonan aki Ministerio di Asuntunan General ta trahando riba dos otro akuerdo. Unu ta un protokòl pa lanta un komishon pa prepará e Konferensha di Reino ku ta tuma lugá e aña aki i e oro ta un MOU entre Reino Hulandes i Repúblika di Fransia ku e meta pa traha huntu riba tereno di petishon pa hasi uso di fondonan Oropeo.

Niun di e dos akuerdonan aki ta trata di temanan di kontenido sino mas bien riba palabrashon di trabou pa prepará pues pa e Konferensha di Reino i tambe instalashon di gruponan tékniko pa traha riba e koperashon entre Reino Hulandes i Repúblika di Fransia ora ta hasi petishon pa bin na remarke pa fondonan Oropeo. Niun di dos kaso ta forma un riesgo pa outonomia di pais, esta Pisas.