Parlamentario Giselle Mc William di MAN a hasi diferente pregunta tokante supsidio ku gobièrnu ta duna.

WILLEMSTAD – E Ministerionan di gobièrnu ta kumpra servisio serka organisashonnan via di supsidio, pero no por ta asina ku e Ministerionan mester paga tambe pa desperdisio ku por tin den e instansianan. P’esei mester yega na un tarifa ku ta hustu pa tur dos partido.

Esaki no ta sosodé aktualmente i Kontraloria General a raportá esaki den su rapòrt. Den kòmbersashonnan hibá ku e representantenan di e Ministerionan ku ta atendé supsidio, Kontraloria General a splika nan ku mester evaluá e preis ku e instansianan ta pidi pa e servisionan i eliminá e desperdisionan. Asina Kontraloria General a kontestá por eskrito riba pregunta di Parlamento.

Durante reunionnan di Parlamento di respektivamente 4 di mei, 24 di mei, 7 di yüni i 30 di ougùstùs di e aña akí, Kontraloria General a duna presentashonnan tokante respektivamente e rapòrtnan ‘Financiële positie gesubsidieerde instellingen’, ‘Overdrachtsbelasting’, ‘Leerplicht vervolgonderzoek’, i ‘Salarisadministratie deel 1 en 2’. Miembronan di Parlamento a hasi pregunta relashoná ku e resultadonan dje rapòrtnan i a duna representante di Kontraloria General e posibilidat pa manda e kontestanan por eskrito. Entretantu Parlamento a risibí e kontestanan.

Den e kaso akí ta trata kontestanan di Kontraloria General riba preguntanan di Parlamentarionan despues di presentashon di dia 26 di aprel último dje rapòrt tokante ‘Posishon finansiero di organisashonnan ku ta risibí supsidio di gobièrnu’ (Investigashon di siguimentu). Parlamentario Giselle Mc William di MAN a hasi diferente pregunta tokante supsidio ku gobièrnu ta duna. Na promé lugá e tabata ke sa si struktura aktual di Pais Kòrsou ta funshonando, i si ántes tabatin un mihó forma di kòntròl pa supsidio.

Segun Kontraloria General, ántes Teritorio Insular di Kòrsou tabata konosé un unidat ku tabata sera akuerdonan di supsidio (zorgcontracten) i kontrolá e organisashonnan ku ta haña supsidio, pero despues a stòp ku e unidat akí. “E unidat ta un forma pa konsentrá e profeshonalnan nesesario i asina hasi mihó uso pa tur área di supsidio na lugá di tin ekspertonan den kada Ministerio riba e áreanan. Esaki ta e kaso prinsipalmente riba e áreanan kolektivo manera finansiero, hurídiko, konosementu i eksperensia ku parti práktiko di e lei di supsidio, pero tambe ku konosementu riba e áreanan pa kua ta duna supsidio.” P’esei Kontraloria ta haña ku awó ku ke bini bèk ku un unidat di supsidio, mester hasi tur posibel pa e bira realidat i pa e bai funshoná bon. Pa logra esaki mester evaluá kiko no a kana bon den e unidat ku tabatin pa por evitá ku ta ripití fayonan.

Parlamentario Mc William tabata ke sa tambe si ‘clustering’ ta e mihó forma pa kontrolá prinsipalmente e instansianan ku ta haña supsidio di mas ku un Ministerio. Kontraloria: “Si p’esei mester enkargá e unidat akí pa kana e proseso di ‘clustering’ hasiendo uso kaminda ta posibel di e rapòrt Mollen i eksperensianan di Ministerionan ku ya a kuminsá kana e proseso di ‘clustering’ manera e Ministerionan di Enseñansa, Siensia, Kultura di Deporte i di Hustisia. I manera indiká kaba, Kontrolaria no ta haña ku e tarifanan ku gobièrnu ta paga ta hustu ni pa gobièrnu mes ni pa e instansianan. “Den kòmbersashonnan hibá ku e representantenan di e Ministerionan ku ta atendé supsidio, Kontraloria General a splika nan ku mester evaluá e preis ku e instansianan ta pidi pa e servisionan i eliminá e desperdisionan, di manera ku gobièrnu no tin ku paga pa eseinan. Pa por hasi esaki, ta rekerí di profeshonal kapasitá. Pues ta mihó pa tin e profeshonalnan nesesario pa hasi e kalkulashon akí den e unidat, di forma ku nan por hasi esaki pa tur Ministerio. Esaki lo mester ta un tarea mas pa e unidat di supsidio.”

Mc William tabata ke sa tambe si ta bèrdat ku e direktornan finansiero tumá den servisio di e Ministerionan, ta duna rekomendashonnan ku no ta sigui. Pero e aspekto akí no a forma parti di nan investigashon. “Pa e motibu akí nos no por kontestá e pregunta akí. Loke sí nos por bisa, ta ku ora agrupá e profeshonalnan den e unidat, lo tin un forma igual pa trata ku aspektonan finansiero pa tur organisashon. Esaki lo benefisiá e kòntròl di e organisashonnan riba kumplimentu ku e lei di supsidio, i pa atendé ku e riesgonan finansiero ku gobièrnu por ta kore pa ku e instansianan finansiero.”

Finalmente segun e Parlamentario, Ministerio di Finansa ta kòrta den e supsidio despues ku a duna nan ‘commitment’ pa un supsidio pa e aña. Kontraloria: “Esaki ta algu ku no ta rekomendabel pa gobièrnu hasi. P’esei e meta di nos rapòrt ta pa gobièrnu mes por haña un bista dje situsahon dje organisashonnan pa por tene kuenta ku esaki ora ku ke kòrta den supsidio dje organisashonnan.”