Giselle Mc William tabata ke sa si  tin  posibilidat pa trese kambio di temporada di vakashon pa por mitigá kalor na skolnan

WILLEMSTAD – Na e momentunan akí e komishon responsabel ta trahando riba e konsepto nobo di vakashon i lo evaluá e posibilidat pa ahuste dje dianan di fakansi. Asina Minister di Enseñansa, Siensia, Deporte i Kultura (ESKD) Sithree “Cey” van Heydoorn a splika Parlamento.

Miembro di Parlamento Giselle Mc William tabata ke sa si tantu e Minister komo ‘stakeholders’ den sektor di Enseñansa ta konsiderá e posibilidat pa trese kambio di temporada di vakashon pa por mitigá kalor na skolnan. Segun e Minister, konsiderando e echo ku e temporada di kalor ta durando mas largu ku normal, por ehèmpel e aña akí for di luna di yüni te ku awó ya nos a konosé temperaturanan ekstremo, no por tene kuenta kompletamente ku esaki. “Tambe mester tene den mente tantu e roster di vakashon, komo e kambio di klima ta afektá otro sektornan tambe. Pues e balanse den esaki ta imperativo.”

E Parlamentario tabata ke sa tambe e Minister su opinion si nos mester lòs for di e sinkronisashon di èksamen lokal ku esun di Hulanda, pa nos mes dikta nos temporada di vakashon. Van Heydoorn no por a kontestá e pregunta akí sin mas. “Pa por duna un opinion riba e punto akí, mester evaluá mas faktor. Pueblo ke lòs kompletamente for di e sinkronisashon di nos programa di enseñansa pa dikta temporada di vakashon? Esaki ta un konsiderashon ku mester hasi ku e diligensia nesesario. Mester evaluá kua sistema lo bini na lugá di esaki. Na kua sistema nos ta ankra e kalidat dje sistema di nos mes i kon nos ta buska akreditashon i rekonosementu di esaki? Bon pa indiká ku e sistema di Karibe, CXC, ta kore basta sinkronisá ku e sistema hulandes, ku algun diferensia. Pa solusho dje problema di klima, lo mi no akudí primeramente na sinkronisashon di nos sistema, pero na e problema mes.”