WILLEMSTAD,—-No ta un sekreto ku otro aña mundu karnavalista lokal ta bai sera konosí ku un grupo di karnaval nobo, ku ta hiba di nòmber “Grupo Alegia”.

Ya e grupo en kuestion a presentá nan trahenan ku nan ta bai kaya kuné durante di e dos marchanan ku ta dia 19 i 21 di febrüari próksimo. Ta asina ku práktikamente tur grupo di karnaval tin nan sede kaminda ku trabounan tin ku tuma lugá. Den e kaso di grupo “Alegria” esaki tambe ta e kaso.

Vigilante Farándula a keda poné na altura ku tin trámitenan fuerte tumando lugá pa ku e sede di e grupo di karnaval menshoná. Trabounan ròndu di e sede ta tumando lugá i esakinan ta kasi kla pa asina trabounan kuminsá na kurpa di e sede mes.

Fuente a bisa Vigilante Farándula ku si tur kos kana manera mester ta, pa e fecha di 5 di desèmber lo bai inougurá e sede di grupo “Alegria” i esaki lo no bai asina asina. Pues ku otro palabra, e sede lo bai habri ku hopi ambiente rondó di dje, meskos ku nòmber di e grupo ta bisa, esta ku hopi alegria.

Pa loke ta trata e parti musikal e grupo ta bai marcha ku agrupashon musikal ICONS i Qsign i huntu ku nan lo bai tei e legendario kantante urbano direktamente for di Aruba i eksklusivamente ku grupo Alegria, AtaNiro ku su banda kompletu.

Tambe lo bai tei Lady Lava i un trailer ku DJ nan i otro artistanan urbano. Pues esaki ta pa garantisá e parti ambiente den e grupo en kuestion. Mas aleu ta asina ku ayera grupo Alegria a presentá otro trahe i esaki a kai den bon tera.