Gwendell Mercelina Jr. huntu ku studiante Julian Brouwers dunando splikashon tokante e resultado di nan investigashon.

Willemstad,– Parlamentario Gwendell Mercelina Jr. huntu studiante Julian Brouwers a tene un rueda di prensa tokante e resultadonan di e investigashon eskolar.

Julian Brouwers, studiante na “Haagse Hogeschool”, ta e promé stazjèr ku a traha den servisio di parlamento komo studiante. E stazjèr ku a risibí un tarea di Gwendell Mercelina Jr, pa investigá kon parlamento por ehekutá kòntròlnan riba “Landspakket” riba un forma mas efektivo posibel.

Mercelina a habri e rueda di prensa indikando ku no ta un sekreto ku parlamento tin problema ku kapasidat. Segun e parlamentario, usando servisionan di stazjèr parlamento lo por solushoná vários problema ku kapasidat.

E sudiante Julian Brouwers a keda enkargá pa analisá kon parlamento por kontrolá ehekushon di e “Landspakket” mihó posibel. Brouwers a duna algun rekomendashon kaminda mester traha kapasidat pa parlamento por trata asuntunan relashoná ku e Landspakket. Solushon nan proponé ta pa oumentá partisipashon di representantenan(parlamentario) di pueblo i inisiá un proseso di pa buta prioridat pa asina aliviá problemanan di kapasidat den e funshon nan di parlamento.

Durante e rueda di prensa, parlamentario Mercelina a indiká ku Julian tabata kore su stazje den un funshon di un empleado personal di  un parlamentario. “Loke Julian a bin hasi ta pa yuda e pueblo di Kòrsou i yuda e órgano mas haltu kual ta parlamento”.

Pe sigurá ku parlamento lo operashonalisá i ehekutá e resultadonan di e rapòrt di Brouwers, parlamentario Mercelina a manda un karta ofisial pa presidente di parlamento, Charreti America, pa e asina trata na instalá un komishon temporal pa trata e puntonan tresé dilanti den e rapòrt di studiante, Julian Brouwers.

Segun e karta di Mercelina, e komishon temporal lo tin vários meta entre otro pa monitoriá i evaluá e implementashon di e “Landspakket” i partisipá aktivo den negoshashon i desishon nan di e Landspakket.

Mas aleu durante e rueda di prensa, Mercelina a splika ku Julian lo ta e promé di hopi studiante ku lo kore stazje den parlamento.