Pen Resort ta bai tin diferente reto pa sigui ku e konstrukshon.

NIEUWE HAVEN,– Durante e wisio sumario kaminda korte a determiná ku e pèrmit di konstrukshon di Pen Resort ta keda anulá, por a nota ku e diskushon di konstrukshon tabata bastante tékniko.

Dos habitante di Penstraat konhuntu a entamá e kaso den korte kontra di Ministerio di VVRP ku Pen Resort B.V. Banda di diskushon tokante e altura di e edifisio di Pen Resort tabata konstruí, por nota ku e habitantenan tabata tin diferente prekupashon si e infrastruktura aktual por akapará un hotèl di 300 kamber na entrada di Penstraat.

For di e veredikto den korte abogado Achim Henriquez kende a duna defensa dje habitantenan, a hiba un diskushon basta tékniko tokante e infrastruktura aktual. Banda di e altura di e edifisio, kual tambe ta un prekupashon, e habitantenan tabata tin otro prekupashon tambe. Apesar di e otro prekupashon nan, korte a dikta ku e prekupashon nan aki no tin balides debí ku konseho di ROP a konkluí ku e Pen Resort a tene kuenta ku mayoria punto di atenshon di adaptashon di e infrastruktura.

Ta asina ku e habitantenan tabata prekupá tokante uso di material di konstrukshon, prekupá tokante e situashon di tráfiko, prekupá tokante e preshon adishonal riba e sistema di deshasí awa fekalia i por último e habitantenan tabata prekupá ku den oranan di anochi lo bai tin molèster di trafikashon adishonal.

For di e veredikto den korte, tur e puntonan di prekupashon ariba menshoná no tabata tin un base, pues korte no a aseptá e argumentonan ku e defensa dje habitantenan a hiba. Ta asina ku ROP di ministerio di VVRP a analisá e plan di konstrukshon kaminda a saka e konklushon ku e edifisio ta wòrdu konstruí dor di blòki i ta wòrdu di pleister, pues no tin indikashon ku material di konstrukshon no ta adekuá.

Mas aleu riba e prekupashon di sistema di riolering tambe a keda analisá dor di ROP. Segun informashon, servisio di UOW lo sòru ku e sistema di riolering di Pen Resort lo wòrdu agregá na e sistema aktual, pues no tin un rason pa kuestioná esaki. Mas aleu, a resultá ku e plan di konstrukshon di Pen Resort ta elaborá tokante e situashon di riolering, pues esaki no mester di ta un prekupashon. Sinembargo, den kolaborashon ku UOW, lo pega e sistema di riolering di Pen Resort na e infrastruktura aktual di e área.