WILLEMSTAD – Riba proposishon di Tim di Maneho di Kuerpo Polisial Kòrsou, minister di Hustisia Shalten Hato a sinta djaluna den oranan di anochi ku un grupo di “medewerkers intake & service” i un “recherche assistant” ku a bini Kuerpo Polisial for di temporada di SKS. E grupo akí a pasa hinter e proseso di solisitut i a kumplí ku tur loke ta rekerí pa asina drenta e servisio di SKS komo “aankomend controle-medewerker”.

Tabata den e periodo ei ku Gobièrnu di Kòrsou a inkorporá SKS den Kuerpo Polisial. E grupo akí a drenta den servisio di Kuerpo Polisial komo “medewerker intake & service”. E grupo akí for di e tempu ei a bini ta vosiferá nan deseo pa wòrdu admití na e “basis politie opleiding”.

Minister Shalten Hato a tuma nota di e eksigensianan i proseso di selekshon enkuestion i a konkluí ku esakinan ta similar na esunnan pa admití na e basis politieopleiding. Minister di Hustisia a kòmbersá ku tim di maneho di KPC i a yega na e akuerdo ku e grupo akí lo ser tuma komo aspirante pa polis na KPC. E “intakers” nan aki awor lo bai kuminsá ku e basis politie opleiding.

E meta ta pa sigui atendé ku tur persona den e organisashon pa siguí duna atenshon na kada unu su posishon hurídiko. E “rechtspositie besluit” di KPC no a yega nan un desishon konkreto. Aña pasa a stòp ku e komishon ku tabata okupá pa start e trayekto di nobo i huntu ku un hurista a kanalisá kon ta kontinuá pa yega na e posishon hurídiko nobo aki pa tur agente polisial.

Próksimo 2 luna lo bai tuma vários desishon relashoná ku diferente organisashon den Ministerio di Hustisia. Lo bai atendé diferente posishon hurídiko den diferente organisashon. Lo tin hendenan ku lo ta kontentu i otronan ku lo no ta di akuerdo i ku ta den nan derecho pa bai e korte di amtenarnan. Minister Shalten Hato lo kontinuá informá komunidat riba e trayektonan akí pa duna klaridat i transparensia den e diferente trayektonan aki.