VLAARDINGEN—Despues di un eksploshon den hal di un edifisio ku apartamentonan na Vlaardingen, polis a detené dos hóben di 13 i 14 aña.

E eksploshon a tuma lugá djadumingu mèrdia 15.00 den Bernweg na Vlaardingen. Despues di un klap duru habitantenan a konstatá ku bentananan a kibra. Polis ta investigando si ta trata di un akshon di vandalismo of un atake dirigí, manera esnan ku a tuma lugá den diferente siudat den fin di siman na Hulanda. E hobennan a keda detené riba Europaboulevard na Vlaardingen. Segun polis a hasi uso di eksplosivo ku nan mes a traha. A keda restunan di un bòter ku likido inflamabel. Posiblemente a hasi uso tambe di vürwèrk peligroso. Tur dos hóben ta biba na Vlaardingen.