Oradó di ‘Island Innovation’ ta splika tokante di ‘Green Communication’, den kual ta kubrí e aspekto di sostenibilidat den balor di markanan di kompanianan.

Willemstad, — Hobennan ta organisá Kolektivo Conference un biaha mas, den kual nan ke trese konosementu di pafó na pais Kòrsou.

‘Kolektivo Conference’ ta e un di e konferenshanan prinsipal na pais Kòrsou ku ya kaba ta andando pa 5 aña. E ta un konferensha tokante di ‘future of tech, entrepreneurship, i intrapreneurship’. E tres konseptonan aki ta difirente. ‘Entrepreneurship’ ta refirí na e aktividat di krea, desaroyá i manehá un negoshi nobo òf eksistente ku e meta di alkansá metanan spesífiko, manera ganamentu di ganashi, inovashon, krea balor, òf solushoná problemanan.

‘Intrapreneurship’ ta un konsepto den kual empleadonan di un kompania òf organisashon ta traha segun nan propio entusiasmo i kreatividat, pa krea, desaroyá, i implementá ideanan nobo i inovashonnan den e ámbito di nan trabou òf e kompania. Un di e organisadónan di ‘Kolektivo Conference’ ta menshoná ku un di e problemanan mas grandi ku islanan tin, entre otro Kòrsou, ta ku ta keda atras riba desaroyonan global. Esaki ta stroba desaroyo i kresementu ekonomiko di e pais.

Ta menshoná ku mester inová si no ta kai atras riba desaroyonan global. E organisadónan di ‘Kolektivo Conference’ mes ta yu di Kòrsou, ku ta biba na Hulanda, pero a skohe pa organisá e konferensha i hasiele kada aña di nobo pa asina aportá ku konosementu riba aspektonan global aki na Kòrsou. E konferensha tin diferente orador ku ta toka diferente topikonan pa asina krea dialogo entre diferente invitadonan, oradó, i òf organisashonan riba topikonan di desaroyo global. 

Na e konferensia tabatin entre otro ‘Island Innovation’ presente, kual ta un organisashon ku ta enfoká pa konstruí ekonomianan sostenibel riba e islanan. ‘Island Innovation’ ta un di e oradónan prinsipal di e konferensia ku ta toka e topiko di sustenibilidat. Desaroyo sostenibel ta un aspekto hopi importante di hinter e konferensha. Den total e konferensha ‘Kolektivo Conference’ tin un total di 25 oradó ku ta bini di diferente parti di mundu manera por ehempel Jamaika, San Fransisco, Brazil, i Lisbon.

Ta organisando ‘Kolektivo Conference’ ya pa 5 aña kaba, i tin plan pa sigui organisa e konferensha aki kada aña di nobo.