Willemstad— Ayera un hòmber di 38 aña a presentá  den korte akusá ku riba dia 23 di aprel 2023 e lo mester a tene relashon seksual ku un menor di edat ku e dia ei tabatin 12 aña di edat sabiendo ku e tabata na altura ku e ta karga e malesa venériko  di HIV.

E hòmber aki ta wòrdu akusá ku riba dia 23 di aprel e lo mester a bai ku e damita na e sentro Casa Linda ku den boka di pueblo ku ta wòrdu yama “ Chino” na unda e la tene relashon seksual kuné. Tur kos a kuminsá ora ku e mama a spièrta den oranan di mardugá i a tuma nota ku su úniko yu muhé na e momento ei no tabata den su kamber esta ku e no  tabata riba su kama. A tuma nota ku e yu a bandoná su kamber via di e bentana. E mama  i tambe e tata di kriansa a kuminsá ku un búskeda den e bario pero no a logra di haña nan yu di 12 aña.

Tabata despues di algun ora esta alrededor di 3 or di mardugá e yu mester a yega kas i a drenta kas via di e mesun bentana bek pero a bin topa ku su mayornan lanta. Mesora e mama i e tata di kriansa a bai puntr’é unda e tabata i e damita a deklará ku e la bai sali ku su amiganan. Tabata na momento ku e mama a bai hole  e yu su man e la sinti holó di parti íntimo esta ku su yu a kaba di tene relashon. Ora a sigui hasi e damita mas pregunta e la bin splika ku enbèrdat e la kaba tene relashon ku un hòmber ku el a konosé riba instagram.  E yu a splika e mama ku e la wòrdu aserka pa un hòmber riba instagram via di e telefon ku el a fia serka su tio. E hòmber  tabata yam’é mami i tambe dushi pa despues a dun’é un number pa asina nan por a komuniká via di e sistema di app. Asina e hòmber a keda bisé ku e stim’é hopi i ku e kier sali kuné. E damita mes a kuminsá splika  e hòmber ku e tin 15 aña miéntras ku ta 12 e tabatin pa despues tambe  bisa ku e tin 17 aña pa bai hasi 18 aña. E hòmber mes a bisa e damita ku e tin 19 aña siendo ku e tabatin 37 aña. Asina nan a sigui komuniká miéntras tantu e hòmber tabata primintí e damita ku e lo kumpra telefon pe  i tambe lo dun’é sèn pa tur kos ku e mester.

Tabata  dia di 23 di aprel ku  e hòmber mester a splika e damita ku e kier pa nan sali bai kome algu na un trùk di pan. E anochi ei e  hòmber a kuminsá manda app indikando na e dama ku e lo ward’é na altura di Toko Pita na Bonam pa nan bai.  E damita mester a bula bentana bai unda e la bin topa ku e hòmber den un Suzuki Swift kolo shinishi ku stürwil kontrali i asina nan a bai keiru pa kumpra kuminda.  Despues di a kumpra kuminda na un trùk di pan riba Cubaweg nan mester a sigui bai den aria di Sambil na unda e hòmber a kore drenta den un kura ku tabatin yen di kamber.  E hòmber mester a papia ku un dama kual a mustra nan un kamber ku number 47 riba dje. Nan a kore drenta den un garashi i e hòmber a sera e porta i asina nan a resultá den e kamber.  E  hòmber a kai drumi riba e kama pa despues a kita su kamisa. Dado momento e hòmber a kue na su man tene i a  hal’é pone drumi riba kama i a subi riba dje ta kuminsá frega. Segun e dama e la splika e hòmber ku e no kier tene relashon seksual pero e hòmber a hala su karson na banda i a kuminsá penetr’é. Esaki no a bai asina fásil kual a pone ku e hòmber a stòp pa despues kita blo sunú i tambe a kita su paña i a bolbe subié i a penetr’é e biaha aki si miéntras e tabata bisé ku si bo stimami lo bo lagami hasié. Segun e damita despues di un ratu e hòmber a baha for di dje i a kana bai den baño na unda el a wak e hòmber ku spèrma den su man kual a pone pensa ku e hòmber a keda kla den su kurpa sin hasi uso di un protekshon.

Seguidamente nan a drenta outo huntu i asina e la wòrdu baha na kas i a bula bentana drenta kamber i a bin topa ku su mama i tambe su tata di kriansa.  E mama a bai dòkter ku su yu unda a bin tuma nota ku e no ta señorita mas i ku tambe ku na e momento ei e tabatin un malesa venériko.  Despues di a deliberá e mama a opta pa bai hasi un denunsia na unda polis a bin detené e sospechoso.  Durante interogashon e sospechoso a bin splika ku e no a tene niun relashon ku e dama ya ku e tin e malesa di HIV.  E sospechoso asta a deklará ku e no konosé e damita mes i ku deskonosínan mester a hack su telefon i probablemente nan lo tabata hasiendo uso di su telefon.