For di den e negoshi a bai ku vários telefòn.

Nieuwe Haven,– E hóben W.F. (18) tabatin 16 aña tempu ku el a haña den problema ku hustisia pa kumpramentu di telefòn hòrtá i hues a bisé ku no kier wak’e mas den sala di korte.

E akusado ta bisa ku el a kumpra e telefon serka un persona i ku el a paga 1350 florin. Ta un I phone 12 pro. E denunsiante kende ta doño di un tienda ku ta bende telefon i ku a ser atraká den yanüari aña pasa, a bisa ku e telefon ta bal entre 400 dòler i 790 dòler (kost preis) i e ta bende e telefon pa mas o ménos 800 dòler.

Hues ta bisa ku den e deklarashon F. a duna diferente vershon di kon el a haña e telefon, E ta bisa ku e tabata hopi spanta i no tabata sa kiko e mester deklará. Despues el a bisa ku el a kumpr’é serka Jean via di facebook.

E ta bisa ku ta esei ta e bèrdat, pues ku el a kumpra e telefon via facebook serka Jean. Jean ta un persona ku na e momentunan aki ta será den SDKK.

Hues ta bisa ku na polis el  bisa dia 4 di mart ku ta serka Jean el a kumpra e telefon. Dia 5 di mart e ta bisa ku el a gaña i ku el a kumpra e telefon serka Tatoo i despues a bini hinter un kuenta ku e tabatin diskushon na skol ku Jean tokante di un atrako ku mester a keda kometé huntu ku Jean i ku e no a haña nada for di esaki. Dia 5 di mart e ta papia di un atrako i no esun di telefon, pues esun pa kual Jean a kai será.

Hues ta bisé ku si bo kumpra un telefon hòrtá riba ganga serka un ladron i bo bende pa abo gana algu riba dje, bo ta yudando e ladron. Hues ta bisa ku esun ku hòrta i esun ku kumpra ta mesun kos.

“Bo ta hóben i ta mira simplemente posibilidat i no ta mira e riesgonan” asina hues Mr. Snitker a splika e hóben akusado. Hues ta bisé ku si bo skohe amigunan robes, bo ta bai haña bo hopi den korte i bo no ta kaba bo skol.

Hues ta sigui bisa ku komo hues e ta a altura ku e kos a spanta e mama di e akusado.

Di tur manera e telefon tabata hòrtá i si bo paga un preis abou, ta nifiká ku bo sa ku ta algu hòrtá.

Hues ta puntra fiskal si W.F. ta ser akusá pa otro delitonan tambe i fiskal ta bisa si, pero ku e kaso ei e no a haña dagfar ainda, pero ku e ta bai haña e dagfar si.