WILLEMSTAD – Direktor di Banko Sentral di Kòrsou i Sint Maarten (CBCS) Richard Doornbosch a pidi Minister di Finansa Javier Silvania por eskrito dia 20 di yüli último pa fiha e fecha 31 di mart 2025, komo e fecha pa introdusí e florin Karibense. Pero e Minister lo no hasi esaki sin mas. El a duna e direktor di CBCS algun hùiswèrk di kumpli kuné, promé ku e stipulá fecha.

Segun Silvania, pa introdusí e florin Karibense, e mester akordá algun dekreto ku mester drenta na vigor. “Promé ku mi por bai di akuerdo ku un sierto fecha, CBCS mester garantisá ku e introdukshon di e florin Karibense no tin konsekuensianan negativo pa nos tráfiko di pago o kousa desòrdu den esaki. I CBCS mester sòru pa tur loke ta nesesario ta prepará.” Relashona ku esaki, CBCS mester tene e siguiente aspektonan na konsiderashon.

Mester tabatin konsulta ku tur partido, manera Kámara di Komèrsio, VBC i bankonan, i ku tur preokupashon di e partnernan a keda solushoná satisfaktoriamente. Mester a duna sufisiente entrenamentu na personal di bankonan i di tiendanan, manera Doornbosch mes a indiká den su karta. Tur mashin i aparatonan, manera mashin di paga ku karchi di banko i mashin di parker, mester ta programá i ta kla pa e unidat monetario nobo.

Tur partner mester a indiká mínimo 2 luna promé ku fecha di introdukshon por eskrito ku nan personal ta sufisientemente familiarisá ku e unidat monetario nobo. I e dekretonan di pais a logra pasa e trámite di legislashon nesesario, tantu na Kòrsou komo na Sint Maarten, promé ku introdukshon di e florin Karibense.

Silvania na Doorbosch: “Hopi amablemente mi ta pidi bo pa informá mi ora ku a kumpli e kondishonnan menshoná akí, p’asina mi por tuma un desishon tokante e fecha.