Wopke Hoekstra

WILLEMSTAD – E tema ei ta responsabilidat dje pais outónomo den Reino mes. Algu ku Ministernan hulandes ta ripití basta. Meskos ta konta e biaha akí pa loke ta trata e tema supervishon di kompanianan di weganan di azar digital.

Minister di Asuntunan di Eksterior Wopke Hoekstra, despues di a pidi tempu na Tweede Kamer, entretantu a kontestá preguntanan hasí pa miembronan di frakshon di koalishon VVD Roelien Kamminga i Ruben Brekelmans. E motibu di nan preguntanan tabata e desishon di Ukraina pa pone kompanianan ruso ku ta operá bou di suplisensia di gobièrnu di Kòrsou, riba su lista di sanshonnan. Hulanda no por bisa mashá, pero ta optimista ku Minister di Finansa Javier Silvania lo introdusí e supervishon adekuá promé ku fin di e aña akí.

Na promé lugá Hoekstra a splika ku Hulanda no tabata sa dje desishon di e Presidente di Ukraina Volodymyr Zelenskyy. “Hulanda ta mará na sanshonnan di Nashonnan Uní i Union Europeo. Ukraina ta tuma sanshonnan di forma independiente. Ukraina no a kompartí aktivamente ku Hulanda tokante e sanshonnan dirigí riba kompanianan di wega di azar. Hulanda tambe a tuma nota dje lista di sanshon ora Ukraina a publik’é. Sanshonnan ku otro paisnan tuma di forma independiente, normalmente no ta un tema di diskushon entre Hulanda i Kòrsou, pero tabatin kontakto ku Kòrsou si a base di e artíkulo menshoná ‘Zelensky ke tuma akshon kontra kompanianan ruso na Kòrsou’.”

E Parlamentarionan tabata ke sa den kiko e kontakto entre e Minister di Relashonnan Eksterior ku Ukraina i otro sosionan internashonal ta konsistí, manera menshoná den e artíkulo i kua ta e kompromiso ku Hulanda tin pa loke ta trata e sanshonnan imponé riba e kompanianan na Kòrsou. Tambe nan a pidi un splikashon mas detayá tokante ken e otro sosionan internashonal ta. Hoekstra: “E gabinete ta den kòmbersashon konstante ku Ukraina i otro paisnan (di Union Europeo, miembronan di G7) tokante medidanan pa hasi e preshon riba Rusia mas grandi posibel. Spesífikamente tokante e medidanan akí tin mas kontakto ku Ukraina pa determiná e kontenido i alkanse eksakto di esakinan. Tambe tin un kontakto adishonal ku outoridatnan di Kòrsou, pasó inisialmente ta dependé di outoridatnan kompetente di e pais ei pa haña un bista di e situashon aktual i pa konsiderá e posibel pasonan.”

Nan a pidi Hoekstra ademas pa indiká te na kua punto ta eksistí un supervishon di kompanianan di wega di azar na Kòrsou proveé pa empresanan fiktisio, kua medida a tuma durante último añanan pa mehorá supervishon, kua medida Hoestra mes a tuma i kua Kòrsou mes a tuma. Hoekstra a ripití: “Kòrsou ta un pais outónomo den Reino i tin su propio leinan di weganan di azar. Otorgamentu di pèrmit, supervishon i kumplimentu di e oferta di tur weganan di azar ta kai denter dje outonomia dje pais Kòrsou. Meskos t konta pa supervishon i ehekushon dje sektor di trust. Hulanda no tin niun ròl den esaki, p’esei Hulanda no a tuma medida. Sinembargo, e reformanan dje sektor di wega di azar ta parti dje pakete nashonal akordá huntu ku Kòrsou. Ta referí akí na e medidanan H12 i H19. Implementashon dje medidanan ta kai bou di Kòrsou. Kòrsou i Hulanda ta supervisá e progreso huntu pa medio di Tijdelijke Werkorganisatie (TWO). Hulanda ta verifiká e akuerdonan dje pakete nashonal i ta brinda asistensia tékniko den un serie di área. Bou dje medidanan akí, e gobièrnu di Kòrsou ta trahando riba un legislashon nobo tokante weganan di azar, den kua entre otro mester kaba ku e sistema di ‘master-sublicenties’. E lei nobo lo sòru tambe pa un supervisor nobo di weganan di azar ku mas fakultat ku esun aktual. Ta premirá ku e supervisor akí lo supervisá e sektor di weganan di azar offshor tambe dje pais.”