Registrashon a notifiká e dos tènkernan banda di otro na Bullenbaai.

Bullenbaai—Wikènt tras di lomba, na terminal di Bullenbaai tabatin un tènker hasiendo traspaso di produkto  (ship to ship) for di un otro tènker. Ta trata di e tènker, Sigma Triumph ku despues di Kòrsou a sali for di Bullenbaai bai Rotterdam, Hulanda. Ta trata di un barku kargadó di produkto petrolero.

Riba djadumingu den oranan di mainta, na Bullenbaai Sigma Triumph promé di sali pa Rotterdam, a risibi bishita di e tènker SeaWays Eagle. SeaWays Eagle, konforme deklarashon di Refineria di Kòrsou, a deskarga produkto riba Sigma Triumph. Despues di a deskarga su kargamentu den Sigma Triumph, SeaWay Eagle mester a sali pa Trinidad. Segun e registro di SeaWays Eagle, promé di a yega Kòrsou e tabata na Aruba, pero segun su registrashon di transmitor, e no a drenta Aruba sino  a keda kologá pafó di kosta di Aruba, lantando e sospecho ku e tènker no a karga nunka na Aruba sino na un otro haf. Úniko haf di krudo mas serka entre Kòrsou i Aruba ta e refineria di Amuay na península di Paraguana, Venezuela. Pero fuentenan den agensia di barku a señalá na Vigilante ku e produkto den tankinan di SeaWays Eagle, no tabata di Venezuela, pero por papia di un produkto klandestino, esta sin lisensia. 

Pa lokual ta trata registrashon, Sigma Triumph supuestamente mester a bini for di Cartagena Colombia i yega Kòrsou 17 di Febrüari. Riba gráfiko ta indikando ku djadumingu ultimo, e di dos tènker, SeaWays Eagle tabata banda di Sigma Triumph den oranan di mèrdia. SeaWays Eagle tambe ta yega riba 17 di febrüari i djadumingu e dos tènkernan a keda señalá banda di otro. Despues, SeaWays Eagle ta los for di Bullenbaai i sigui su ruta pa Trinidat di Tobago, Galeota Point, pero sorpresivamente ta keda kologá dilanti kosta di Kòrsou te den oranan di anochi tempran. Te ku ayera mèrdia riba su “tracking” e tènker no tabatin un orario pa yega su destinashon na Trinidad i tabata kologando na kosta sùit ost di Boneiru.

Pa lokual ta trata Sigma Triumph, despues di a tuma e kargamentu di produkto abordo for di SeaWays Eagle, ayera e la sali for di Bullenbaai ruta Rotterdam. E interkambio entre e dos tènkernan di krudo tin sufisiente informashon pa inisiá un sospecho ku riba Sigma Triumph tin produkto klandestino, den e kaso aki fuel oil, rumbo pa Hulanda.

No ta konosí tampoko si e kargamentu tabatin mester di un lisensia di OFAC. Ta un hecho ku Estádos Unídos a anunsiá di suavisá e sanshonnan di eksportashon for di Venezuela, pero resientemente e suavisashon a bolbe bira un tópiko di diskushon internashonal.