Fransisco Mancelli di Lead Group tabata durante òktober den korte na Nieuwe Haven.

Bullenbaai—Na momento tur hende a pensa ku problema di Fuel Oil ta solushonando, awor tin desaroyo nobo. E kompania Lead Group di Panamá, ku despues di United Petroleo Corporation (UPC) i Knob Trading a sali dilanti komo representantenan di e 490 mil bari di fuel oil, ta rumbo pa Kòrsou bek pa claim sobrá sèn riba e benta di fuel oil.

No ta promé biaha Lead ta yega Kòrsou. Durante tratamentunan sivil pa kita embargonan imponé riba e fuel oil tambe e kompania a manda representashon Kòrsou unda den korte a claim propiedat di e produkto. Entretantu a bende e fuel oil pa 28.5 mion florin kual parti di dje ta bai pa Bullenbaai. Ta kalkulá ku entre 8 pa 9 mion florin ta resta di e benta ku mester bai pa e propietario di e fuel oil. E Lead ta na kaminda pa claim esaki.

Despues ku na Sèptèmber último, Refineria di Kòrsou a permití e fuel oil drenta di kontrabanda den tankinan na Bullenbaai, a start un guera internashonal pa e fuel oil, pero tambe na Venezuela a kuminsá pèrsigui maneho di e kompania, United Petroleo Corporation. A bin resultá ku PDVSA a duna órden pa pèrsigui i detené operadornan di United Petroleo pa sakamentu di krudo klandestino for di Venezuela sin pèrmit di e kompania estatal petrolero. United Petroleo Corporation (UPC), propietario di e fuel oil den tankinan di Bullenbaai, ta involukrá den un robo i desfalko kontra di PDVSA balorá na 435 mion dòler, kasi 800 mion florin. United Petroleo Corporation tabata e kompania ku via di Caribbean Petroleum Refinery di Kòrsou, Curaçao Refinery Utilities, Refineria di Kòrsou, KNOB Trading a logra saka fuel oil kontrabanda for di Venezuela i pone den tankinan na Bullenbaai.

Segun prensa venezolano, tras di e kompania UPC tabata tin un teniente kolonèl a saka mas ku 500 mion bari di krudo for di PSVSA pa distribuí klandestinamente. UPC entretantu a debe PDVSA di Venezuela 500 mion dòler lokual a kondusí na bankarota di e kompania  na Novèmber 2022. Dos luna promé na Sèptèmber 2022, UPC huntu ku RdK i demas kompanianan den e struktura a logra trese fuel oil ilegal for di Venezuela pa Kòrsou.

Tin sospecho ku tabatin diferente Kolonèl i Kolonèl Teniente involukrá ku United Petroleo Corporation i na Aprel 2023, detenshonnan a kuminsá kai na momento a arestá Antonio Perez riba 18 di Aprel di e aña aki. Tambe a keda arestá den e kaso Roger Ramirez Dorante Teniente Kolonel di e Akademia Militar Estatal di Venezuela. Promé di a laga e kompania bati bankarota, a resultá ku miembronan den kuerpo militar ku rango haltu na Venezuela a uza e kompania pa saka krudo i derivadonan di krudo, na un manera klandestino for di Venezuela pa kometé desfalko kontra di e kompania. Unu di e kargamentunan, ku a partisipá na e entreganan di kontrabanda ta esun ku Refineria di Kòrsou i CRU di Kòrsou a partisipá na dje. Korte na Kòrsou tampoko no a duna veredikto definitivo ta ken ta propietario di e fuel oil.

Na Kòrsou a surgi un bataya formal pa propiedat di e fuel oil. E grupo di Raul Soccoro, propietario di SOCAP huntu ku eks sosionan den Caribbean Petroleum Refinery a kuminsá bringa ku Erchenel Doran, kende tabata nan sosio lokal. E bataya tabata pa derechi riba e fuel oil kontrabanda den tankinan na Bullenbaai. Den e trayekto di sèn, a bin deskubrí un otro kompania panameño, bou di KNOB Trading ku tabata paga pa hür e alokashonnan na Bullenbaai. Pero bankonan a bin para tur transakshon di KNOB pa Kòrsou, debí na legitimashon ofisial di e fuel oil. A surgi despues dos intento di beslag ku korte a otorgá pa despues despensa tur embargo riba e fuel oil.

Konsekuentemente un kompania nobo a paresé pa claim e fuel oil. Ta trata di Lead Group, tambe di Panamá. Lead a manda nan konsehero “top gun”, Fransisco Mancelli pa atendé e asuntunan riba e fuel oil. Mancelli a logra kombensé korte na Nieuwe Haven pa eliminá tur embargo riba e fuel oil pa nan por paga CRU e hür atrasá i asina bai ku 20 mion dòler balorá na fuel oil. Mancelli no a logra i fuel oil a bai destaho. Awor mester deskonta e sèn ku RdK/CRU tin derechi riba dje i sobrá sèn mester bai pa e propietario, ken esei ta, te ainda no tin un definishon.