Karan Doekhi, abogado pa Lead Group di Panamá

Nieuwe Haven—E kompania Lead Group di Panamá a laga su demanda sivil kai den korte, lantando e sospechonan fuerte riba un negoshashon pafó di korte pa yega na un solushon di e fuel oil den tankinan na Bullenbaai. E sospechonan a bira mas fuerte despues ku abogado di Lead, Karan Doekhi no tabata kier a duna komentario na Vigilante.

E abogado no tabata kier a duna un kontesta si e kaso lo sigui ni tampoko si tabatin un akuerdo pafó di korte. E konfrontashon di siman pasa ku a keda kanselá, mester a bira e di dos biaha ku Lead ta hiba Curaçao Refinery Utilities korte sivil. Na promé okashon, Lead a logra kombensé korte pa eliminá un embargo di CRU riba 490 mil bario di fuel oil den tankinan di Bullenbaai for di Sèptèmber 2019. E biaha aki e intenshonnan di Lead pa bolbe bai korte ta pa “claim” riba e benta di fuel oil kual a sosodé mediante un findishi.

E fuel oil ta simplemente un problema grandi pa i bèrgwensa pa Kòrsou. Despues di tur e disputanan i arestonan internashonal i na Venezuela inkluso bankarota, Lead Group, ta pretendé di ta propietario di e fuel oil. Na momento RdK òf CRU opta pa bende e fuel oil, Lead ke pago di e restante riba e suma di benta. Te ainda un suma di 28.5 mion dòler ta keda menshoná for di kual alrededor di 9 mion dòler mester bai na pago di CRU pa servisio di “bùnkering” di e fuel oil.

E sobrá sèn, Lead Group ta claim. Pero entre CRU i Lead a surgi mas disputa. Entre otro kuantu sèn mester deskontá for di e hür atrasá na Bullenbaai. CRU, aparentemente kier kita mas tantu sèn. Entretantu mañan 14 di Febrüari tin un destaho públiko mas riba e fuel oil, lokual atrobe ta sospecha ku por ta e kousa ku Lead a posponé su demanda den korte sivil. Ta asina ku Lead Oil no tin nada di haber ku e kontrakt di hür i ta argumentando ku mester kita ménos sèn for di e benta di fuel oil riba e retaso di hür na Bullenbaai. Manera ta konosí, na ougùstùs 2022, CRU riba konseho di Refineria di Kòrsou,  a firma un akuerdo ku CPR pa 6 luna. E kontrakt a vense i keda prolongá pa un periodo indefiní pero ku un tèrmino di finalisashon di 3 siman despues ku RdK mes a bin ripara ku e kompania kual nan a konsehá gobièrnu tabata un farse grandi.

Den un komunikado na Febrüari 2023, Refineria di Kòrsou (RdK) finalmente a aseptá nan fayonan i laga informá Caribbean Petroleum Refinery (CPR) ku ta tèrminá e kòmbersashonnan tokante maneho i operashon di e refineria i Bullenbaai. RdK a informá CPR na mes momentu ku no ta konsiderá CPR komo ‘preferred bidder’ mas den e proseso i konsekuentemente lo no kombersá ku CPR eksklusivamente mas.  E kòntrakt di hür di e tankinan na Bullenbaai dor di CPR entretantu si a keda prolongá i  kontinuá di akuerdo ku e kòntrakt, segun e komunikado di RdK. E kantidat di 490 mil bari di fuel oil tambe a keda den e tankinan. Ta trata di fuel oil hòrtá na Venezuela pa un kompania United Petroleo di Panama. Pa hasi e situashon mas pió, United Petroleo Corporation (UPC), propietario di e fuel oil den tankinan di Bullenbaai, ta involukrá den un robo i desfalko kontra di PDVSA balorá na 435 mion dòler, kasi 800 mion florin. United Petroleo Corporation tabata e kompania ku via di Caribbean Petroleum Refinery di Kòrsou, Curaçao Refinery Utilities, Refineria di Kòrsou, KNOB Trading a logra saka fuel oil kontrabanda for di Venezuela i pone den tankinan na Bullenbaai.

Promé di a laga e kompania doño di e fuel oil, bati bankarota, a resultá ku miembronan den kuerpo militar ku rango haltu na Venezuela a uza e kompania pa saka krudo i derivadonan di krudo, na un manera klandestino for di Venezuela pa kometé desfalko kontra di e kompania. Unu di e kargamentunan, ku a partisipá na e entreganan di kontrabanda ta esun ku Refineria di Kòrsou i CRU di Kòrsou a partisipá na dje. Lead Oil for di medio 2023 ta bringando ku RdK i CRU pa derechinan riba e fuel oil.  

Pero despues di un tratamentu na òktober último, korte sivil den un wisio sumario no a konkluí ta ken en realidat ta propietario di e fuel oil. Konsekuentemente, e destaho di mañan ta bira un hecho interesante si akaso e sigui.