Saskia de Reuver: direktor Relashonnan di Reino/Paisnan na Ministerio di Asuntunan Interno i Relashonnan di Reino di Hulanda

Punda– Saskia de Reuver ku ta direktor Relashonnan di Reino/Paisnan na Ministerio di Asuntunan Interno i Relashonnan di Reino di Hulanda, a pidi Kòrsou diskulpa.

E organisashon ku ta supervisá ehekushon di e medidanan stipulá den e Pakete Nashonal pa Kòrsou, Tijdelijke Werkorganisatie (TWO) a publiká e Plan di Reforma di Servisio di Impuesto (Hervormingsplan Belastingdienst) riba nan página digital. E organisashon a publiká esakí integralmente, loke a violá palabrashonnan hasí. Riba òrdu di gobièrnu (lesa Minister di Finansa interino Ruthmilda “Mimi” Larmonie-Cecilia) TWO a kita e plan bèk for di nan página digital.

Minister Larmonie-Cecilia a dirigí su karta na Judith Jeurissen ku ta ‘programmamanager’ di TWO. E karta ta kontestá pa tantu De Reuver, komo Jeurissen, pero firmá pa solamente De Reuver. Minister di Finansa Javier Silvania a publiká e karta di diskulpa ayera. Minister Larmonie-Cecilia den su karta anterior a mustra e organisashon riba e echo ku publikashon integral dje plan ta violashon di artíkulo 11 insiso 3 di e Reglamento di Forma di traha (Werkwijzereglement, WWR) stipulá den e Areglo Mutuo tokante koperashon den reformanan di dia 4 di aprel último (OR). Konforme e WWR por publiká solamente e kompilashon di maneho di un plan di akshon aprobá.

TWO entretantu a kita e plan for di nan página digital. Pero ya diferente persona interesá, manera entre otro Vigilante, a logra lesa i analisá esakí i naturalmente bo korant hudisial investigativo ta publiká partinan di esakí, pa informá pueblo. Minister di Finansa Javier Silvania mes ta den eksterior, pero a informá pueblo via di su página sosial ku dia 11 di ougùstùs próksimo, e trahadónan di Servisio di Impuesto i tambe di Stichting Belasting Accountant Bureau (SBAB) ta haña informashon tokante e Plan di Reforma akí. Bo korant hudisial investigativo Vigilante ta kuminsá informá pueblo mientrastantu.

De Reuver a informá den su karta di ayera dirigí na Minister Silvania ku dia 1 di ougùstùs último el a risibí e karta di un dia promé den kua ta mustra riba e violashon di e WWR. “Pa un eror nos a klasifiká e plan di reforma komo un rapòrt i no komo un plan di enfoke, i p’esei mi diskulpa. Riba 30 di yüli tabatin kontakto entre mi trahadónan i esnan di bo gabinete, i a palabrá ku lo kita e plan di reforma mas lihé posibel for di e wèpsait di TWO. Mi por konfirmá bo ku djaluna mainta 31 di yüli esaki a tuma lugá tambe. Riba término kòrtiku lo publiká e kompilashon di maneho manera e ta integrá den e plan di reforma, riba e wèpsait di TWO, tantu na Hulandes komo na Papiamentu, di akuerdo ku e Werkwijzereglement.”

De Reuver a manda un kopia di e karta pa tantu Sekretario di Estado di Asuntunan Interno i Relashonnan di Reino Alexandra van Huffelen, Minister di Asuntunan General di Kòrsou Gilmar Pisas, komo presidente dje e komishon nashonal di reforma NHC di gobièrnu di Kòrsou Caryl Monte.